23 жыл: Судья Шерзаттың өліміне кінәлілерге неліктен ауыр жаза бергенін түсіндірді

Қоғамды дүр сілкіндірген 16 жасар Шерзат Полаттың өліміне қатысты сот аяқталды. Судья прокурорлар сұраған жазаны тағайындады. Шерзатты өлтірді деген басты күдіктінің бірі Абзал Шынасылға сот 23 жыл бас бостандығынан айырылды. Үкімді оқып болған соң сот шешімін түсіндірді, деп деп хабарлайды Orda.kz.

Судья әуелі дәлелдердің толық зерттелгенін, сотталушылардың кінәсі толық дәлелденгенін айтты.

«Сот барлық ұсынылған дәлелдемелерді зерттеп, сотталушылардың тағылған айып бойынша кінәлары толық дәлелденген деген тұжырымға келді. Жәбірленушілердің, куәлардың айғақтары оқиға орнынан алынған бейнежазбалар бар. Заттай дәлелдемелер алынған. Қажетті сараптамалардың барлығы өткізілген. Олардың шынайлылығында күмән жоқ. Сотталушылардың әрқайсысының әрекеттерін нақты анықтауға мүмкіндік береді», — деді судья Ержан Жанұзақов. 

Ол басты күдікті Абзал Шынасылға неліктен 23 жыл жаза бергенін де айта кетті.

«Шынасылға Шерзат Полаттың өліміне алып келген, пышақ жарақатын келтіргені, медициналық-криминалистік сараптама қорытындысымен бекітілген. Сараптама Шынасылдан алынған пышақпен, пышақ жүзінің сипаттамасына байланысты жарақат келтірілгенін көрсетті. Пышақ Шынасыл көрсеткен жерден алынған, тергеу кезінде Шынасыл кінәсін мойындап айғақ берген», — деді ол. 

Ал қалған айыптылардың неліктен бұзақылық бабы бойынша Абзалға қарағанда аз жаза алғанын былай деп түсіндірді:

«Осы орайда басқа сотталушылардың әрекетінің салдарынан Шерзат Полатқа жеңіл дәрежелі зиян келтірілген. Бұл да сараптама қорытындысымен расталды. Заң бойынша адам өлтіруді адамдар тобымен жасалған деп егер ол екі немесе одан да көп тұлғалардың бірлесіп жасағанда танылады. Жоғарыда айтқанымдай өлімнің себебі бір пышақ соққысынан болған және оны Шынасыл жасаған. Сәйкесінше адам өлтіру бойынша кінәлі деп таныды. Бұзақылық — заң бойынша арсыздықпен барынша арсыздықпен ерекшеленетін, соның ішінде күш қолданумен, соның ішінде жеңіл дәрежелі денсаулыққа зиян келтірумен ұштасқан қоғамдық тәртіпті аса қатігездікпен бұзу болып танылады. Сондықтан жәбірленушілердің денсаулығына соның ішінде Полатқа жеңіл дәрежелі зиян келтірген сотталушылардың әрекеттері бұзақылық ретінде сараланған», — деді Жанұзақов. 

Еске сала кетсек, сот алдында тілшімізге марқұмның әпкесі кінәлілердің бәріне тобымен ауыр жаза берілуін талап ететінін айтқан еді.

Судья Ержан Жанұзақов сотталушыларға үкімін оқып, басты күдікті Абзал Шынасылға 23 жыл жаза тағайындайтынын айтты. Ал Равиль Сакиев 20 жыл, Дидар Қалиахмет – 293-баптың 3-бөлігі – 7 жыл, Нұрбол Тоқтаубаев – 293-баптың 3-бөлігі – 7 жыл, Дархан Әскентай – 293-баптың 3-бөлігі – 7 жыл, Шыңғыс Белғожаев – 293-баптың 3-бөлігі – 7 жыл, Нұрқияс Ілиясов – 293-баптың 3-бөлігі – 9 жыл, Азамат Тоқтаубаев – 293-баптың 3-бөлігі (бұзақылық), 188-бап (ұрлық) бойынша – 15 жыл, Думан Ысқақ (кәмелетке толмаған) – 434-бап (ауыр қылмыс туралы хабарламау) – 1 жыл 6 ай бас бостандығынан айырылды.

Бұл оқиға қазақ қоғамын дүр сілкіндіріп, қызу талқыға түсті. Оқиға былтыр Талғарда 4 қазан күні болды. Бір топ адам, соның ішінде осы сотталушылар бар дүкен иесі Қаржаубаймен, ұлы Шерзатпен және ағасы Нұрғанатпен жанжалдасып, арты кісі өліміне ұласты. 16 жасар Шерзат қаза болды. 9 желтоқсан күні таңертең жасөспірім Шерзат Полаттың ағасы Нұрғанат Ғайыпбаевтың денесі марқұм Шерзаттың зиратының қасынан табылды. 12 қазан күні Азат ауылындағы марқұм болған Шерзаттың отбасының үйі өртеніп кетті.