Жетісу облысында қар құрсауынан 39 адам құтқарылды

Жетісу облысында 2024 жылдың 12 және 13 қаңтарында республикалық маңызы бар Үшарал – Достық тас жолында қарлы боран мен көрінудің нашарлығынан 49 көлік қар құрсауында қалды, деп хабарлайды Orda.kz.

Облыстық Төтенше жағдайлар  баспасөз қызметінің мәліметінше, тұрып қалған көліктердің 42-сі жүк көлігі.

Азаматтарды эвакуациялау үшін төтенше жағдайлар қызметкерлері арнайы жол талғамайтын көліктермен жолға шықты.

«Қабылданған шаралардың арқасында Достық және Көктұма станцияларында қар құрсауында қалған 39 адам, оның ішінде 15 Беларусь азаматы эвакуацияланды. Құтқарылғандарға медициналық көмек қажет емес. 15 жүргізуші эвакуациядан бас тартып, көліктерінде қалды. Айтуларынша, оларда бір апталық жанар-жағармай және азық-түлік қоры бар» деп мәлімдеді баспасөз қызметі. 

Облыстық құтқарушылар тұрғындарды ауа райының өзгеруін бақылап, дауылды ескерту хабарламаларына немқұрайлы қарамауға және қажетті сақтық шараларын қабылдауға шақырады.