Жанжал ошағы: Мурманскта қазақтар не үшін төбелесті

Белокаменкада төбелес неден пайда болды және Ресейдің солтүстігінде қазақстандық мигранттар қалай тұрады?

Қазақстандықтар «Ресейде жақсырақ» деген пікірге үйренген. Алайда, өмір мен еңбек жағдайлары көршілес елде айтарлықтай жақсы емес. Orda.kz Белокаменкадағы жұмысшылар не үшін төбелескенін және қақтығысқа Қазақстан азаматтары неге қатысқанын білді.

Жұмысшылар арасындағы төбелес 23 наурызда Мурманск облысының Белокаменка ауылындағы ауысыммен жұмыс істейтін адамдар арасында орын алды. Мұнда 10 мыңға жуық адам, соның ішінде Түркия, Қытай, Қазақстан және басқа республикалардан келген адамдар жұмыс істейтін ірі тонналы теңіз орталығының құрылысы жүріп жатыр. Желіде қазақ сөзі естілетін төбелес бейнесі пайда болды. Ресми мәліметтерге сәйкес, төбелес салдарынан алты адам зардап шеккен, барлығы Ресей азаматтары.

Мурманск қаласының бұрынғы тұрғыны, қазіргі алматылық Тарас Игашов бізге қалада және облыста жұмыссыздық орнағанын, алып кәсіпорынды негізінен заңсыз мигранттар, яғни ең арзан жұмыс күші құратынын айтты.

— 2019 жылдың күзінде Мурманск Белокаменкада үлкен ғимарат салынып, 10-15 мың мигрант әкелінді. Сонымен қатар, Мурманск тұрғындарының өздері лайықты жалақыға жұмыс таба алмайды. Пандемия басталған кезде, Белокаменкада халықтың көп жиналуына байланысты жұқтыру ошағы пайда болды деген әңгімелер басталды. Көптеген өлім тіркелді.

Игашов сырттан келгендерді жұмысқа тартқанда оларға тиесілі еңбек жағдайлары жасалмайтынын айтты.

— Менің ойымша, бұл жанжалдың себебі ұлттық мәселе болды. Сырттан келгендер ішінде славяндар көп. Негізінде, Мурманск - көпұлтты қала. Мұнда көшіп келгендер көп. Бұл скинхедтер қонақтарды қуып жүрген Санкт-Петербург немесе Мәскеу емес.

Бұл жолы жанжал жергілікті көлемде болды. Мурманскіде бұл жағдайды бәрі бірдей білмейді. Игашовтың таныстары - Мурманск тұрғындары жергілікті теледидарда Белокаменкадағы төтенше жағдай туралы айтпағанын және мұндай адаңдаушылық тудырған кадрлар көрсетілмегенін айтады.

Авторы: Анна Даниловская
Аударған: Мұхит Тұрсынәлі