Жаңаөзенде жұмысшылар ереуілге шықты

Жаңаөзенде «МұнайСпецСнаб Компани» жұмыскерлері еңбек құқығының тапталуына байланысты ереуілге шықты, деп хабарлайды Orda.kz.

28 қазан күні олар ерікті түрде жұмыстарын тоқтатып, істемей қойған.

«Біз, «МұнайСпецСнаб Компани» ЖШС жұмысшылары, еңбек құқықтарымыздың бұзылуына және әлеуметтік әділетсіздікке алаңдаймыз. Талаптарымыздың орындалмауына байланысты біз 2025 жылғы 28 қазанға қараған түннен бастап жұмысты тоқтаттық. Біздің талаптарымыз – әділеттілік пен жұмыскер құқығының қорғалуы, сондай-ақ басшылықтың біздің үнімізге құлақ асуы», — деді бейнероликте олар. 

Жұмыскерлердің сөзінше, жалақы көтерілмеген, Конституция күніне сыйақы да берілмеген.

Еске сала кетейік, 27 қазанда Алматы қаласы әкімдігіне Бостандық ауданының ондаған тұрғыны жиналды. Олар әлі ашылмаған №224 жаңа мектептің қазақ тілінде білім беруін талап етті. Жаңа мектеп «Жайлы мектеп» ұлттық жобасы аясында салынған. 2500 оқушыға арналған бұл мектеп — қаладағы ең ірі әрі заманауи нысандардың бірі. Алайда мектептің есігі ашылмай жатып-ақ оның оқыту тілі ата-аналар арасында қызу талқылауға түсті.