Қызылордада 152 адамды алдап, 90 миллионнан астам теңгені қолды еткен алаяқ сотталды, деп хабарлайды Polisia.kz.
Жедел-іздестіру іс-шараларының нәтижесінде Қызылорда қалалық полиция басқармасы тергеу бөлімінің тергеушісі Нұрбол Нұрмағамбет жұмыссыз, бұрын сотталған 39 жастағы әйелді ұстады. Қаржы пирамидасын құру арқылы ол 152 адамды алдап, 91 миллион 496 мың теңге алған.
Оның алаяқтық әрекеті 2019 жылдың тамызында басталды. Сол кезде ол WhatsApp желісінде «Ай-шуақ» тобын құру арқылы осы қаржылық пирамиданы басқарды. Топқа бірінші болып қосылған мүшелер алғашқы жарналарын салып, оларды 40 пайыздық үстемемен алған болып шықты. Жалпы тауар айналымы 1 миллиард 695 миллион 538 мың теңгені құрады.
Аталған факті бойынша сотқа дейінгі тергеу Қылмыстық кодекстің 217-бабы 3-бөлігінің 2-тармағы бойынша аяқталды. Қызылорда қалалық сотының шешімімен айыпталушы бес жылға бас бостандығынан айырылды.
