Ұлттық ұлан сарбаздары Абайдың 50 өлеңін жатқа айтып, жұртты сүйсіндірді

Қазақ халқының ұлы ақыны Абайдың 180 жылдығы қарсаңында Ұлттық ұлан сарбаздары өз елінің мәдениеті мен ақынға және «Сөз патшасы — өлеңге» деген құрметтерін паш етті, деп хабарлайды Orda.kz.        

Қатардағы сарбаз  Бақытжан Артықбай әдебиетке қызығушылығын бастауыш сыныптан бастап танытқан. Сол кезде-ақ Абай Құнанбайұлының өлеңдерін жаттай бастаған. Кейін ақын шығармаларын оқу бойынша республикалық байқаудың жеңімпазы атанды. Бүгінде ол Абайдың 50-ден астам өлеңін жатқа біледі.

«Абайдың сөздері – адамгершілік пен даналықтың мектебі. Бос уақытымда оның өлеңдерін қайталап оқимын, ішкі жан-дүниемді тәрбиелеуге тырысамын. Әр өлеңінде терең руханият, тәлім мен тәрбие сезіледі», – дейді сарбаз. 

Құқықтық тәртіп әскері қатарында Абай шығармашылығын құрметтейтін тағы бір сарбаз – Жұлдызбек Ромашев та бар. Ол да ұлы қазақ ақынының шығармаларын мәнерлеп оқу бойынша республикалық байқаудың жүлдегері. Анасы – қазақ тілі мен әдебиеті пәнінің мұғалімі болғандықтан, ол бала кезінен Абай Құнанбайұлының шығармаларымен сусындап өскен.

2025 жылы ұлы қазақ ақыны, ағартушы және ойшыл Абай Құнанбайұлының туғанына 180 жыл толады. Бұл маңызды күнді Алматыда республикалық «Таза Қазақстан» бағдарламасы аясында экологиялық акциясы өтеді.

Бұған дейін Мәулен Жанболатұлы  өзінің Instagram парақшасында 2014 жылы Бейжіңнің орталығындағы Чаоян саябағында орнатылған Абай Құнанбайұлы ескерткішінің видеосын жариялады. Бұл ескерткішті атақты қытай мүсіншісі Юань Сикунь өз бастамасымен жасап, жеке өзі орнатқан.

Биылғы маусым айында антикор Абай Құнанбайұлының 180 жылдығына орай ақынның  өлеңдері мен қара сөздерін оқудан челлендж жолдады.

Армениядағы Қазақстанның мәдениет күндері кезінде Ереванда  Абай атындағы саябақтың салтанатты ашылуы өтті. Бұл президент Қасым-Жомарт Тоқаевтың Ереванға ресми сапары барысында қол жеткізілген уағдаластықтардың арқасында орындалды. 

Мамыр айының соңына қарай Қытай астанасында ҚР Қытайдағы Елшілігінің қолдауымен Абай Құнанбаев, Шәмші Қалдаяқов, Алтынбек Қоразбаев, Нұрғиса Тілендиев және т.б. қазақтың көрнекті  қайраткерлерінің туындылары таныстырылды.