Түркістан облысында қарулы ер адам полицияға оқ атты

Түркістан облысының Мақтаарал ауданында ер адам полицейлерге оқ атып, олардың бірін жаралады, деп хабарлайды Orda.kz.

Мақтаралда жергілікті тұрғын бұрынғы күйеуі үйге қарумен келіп, балалардың көзінше жанжал шығарғаны үшін полиция шақырған. Ер адам мен полицияның арасындағы атыс сол сәтте басталыпты.

Полиция келген сәтте ер адам үйден қару ұстап жүгіріп шығып, көршісінің қорасына тығылған. Полицейлер оны берілуге үгіттеуге тырысқан, бірақ берілудің орнына ер адам оларға оқ атып, бір қызметкердің жамбасын жаралады. Полицейлер ескерту ретінде ауаға оқ атқанымен, шабуыл жасаған адам тоқтамапты.

Соңында полиция оған қарсы оқ атуға мәжбүр болды. Ер адам ауыр жарақат алып, оқиға орнында көз жұмды. Сонымен қатар, қорадан тіркелмеген қару, оқ-дәрілер тәркіленді.

«Қылмыстық іс қозғалды. Тергеу барысы облыстық полиция департаменті басшылығының бақылауында»,  деп түсіндірді Түркістан облысының полиция департаменті.