Трамп пен Путин Мажарстанда кездеседі

АҚШ президенті Дональд Трамп Ресей президенті Владимир Путинмен Будапештте өтетін алдағы кездесу туралы жария етті, деп хабарлайды Orda.kz.

Трамптың сөзінше, кездесудің басты мақсаты — Ресей мен Украина арасындағы соғысты тоқтату жолын қарастыру.

«Путин мен мен Будапештте кездесеміз. Бұл соғысты, яғни масқара қантөгісті тоқтата аламыз ба, соны көрмекпіз», — деді Трамп.

Сондай-ақ, Трамп Путинмен соңғы әңгімесінде тараптар Таяу Шығыстағы бейбітшілікке қатысты жетістіктер мен екі ел арасындағы болашақ сауда байланыстарын талқылағанын атап өтті.

 «Президент Путин мені және АҚШ-ты Таяу Шығыстағы бейбітшілікке қол жеткізгеніміз үшін құттықтады. Оның айтуынша, ғасырлар бойы армандаған жетістік. Сондай-ақ, ол Меланья ханымның балалармен жұмысқа атсалысқаны үшін алғысын білдірді», — деді Трамп.

Кездесу барысында екі ел арасындағы сауда қатынасы соғыстан кейін қалай дамитыны жайында да айтылған.

«Біз келесі аптада жоғары деңгейдегі кеңесшілеріміздің кездесулерін өткізуді келістік. АҚШ тарапынан алғашқы кездесуді Мемлекеттік хатшы Марко Рубио басқарады. Қалған қатысушылар кейінірек жарияланады. Кездесудің нақты орны әлі белгіленген жоқ», — деді ол.

Айта кетейік, Қасым-Жомарт Тоқаев АҚШ президенті Дональд Трампты Газа секторында көптен күткен бейбітшілік орнатудағы маңызды дипломатиялық жеңісімен құттықтады.