Трамп енгізген баж салығы АҚШ-та заңсыз деп танылды

Дональд Трамп баж салығына қатысты саясат жүргізу арқылы өзінің президенттік өкілеттігін асыра пайдаланған. Мұндай шешімді Вашингтондағы федералды апелляциялық сот шығарды, деп хабарлайды Orda.kz The Guardian басылымына сілтеме жасап.

Құжатқа сәйкес, Трамп әкімшілігі халықаралық тауарларға енгізген «өзара» тарифтердің басым бөлігі заңсыз деп танылды. Бұл мәселені қарауға шағын бизнес өкілдері мен америкалық штаттар коалициясы тарапынан берілген сот талап-арыздары себеп болды.

Америка заңнамасы президентке төтенше жағдай кезінде кең өкілеттіктер береді, алайда бұл өкілеттіктер тарифтерді, баж салығын және салықтарды белгілеуге қатысты қолданылмайды. Тарифтерді енгізу Конгресстің негізгі құзыреті болып саналады.

Соттың пікірінше, Трамп енгізген көптеген баж салықтары «ауқымы, сомасы және мерзімі жағынан шектелмеген» және Трамп әкімшілігі сүйенген заңның шеңберінен шығып кеткен.

Соған қарамастан, бұл тарифтер 14 қазанға дейін күшінде қалады. Осылайша, Ақ үйдің Жоғарғы сотқа шағым түсіруіне әлі уақыты бар.

Трамп сот шешіміне Truth Social әлеуметтік желісінде пікір білдірді:

«Егер бұл тарифтер бір күні алынып тасталса, бұл ел үшін толық апат болады. Бұл бізді қаржылай әлсіретеді, ал біз мықты болуымыз керек» деді ол. 

Ол бұл тарифтерді америкалық жұмысшылардың мүддесін қорғау мен елдегі бизнесті қолдаудың «ең тиімді тетігі» деп атады. Сонымен қатар, өз әрекеттерін «Халықаралық төтенше экономикалық өкілеттіктер туралы» заңмен (IEEPA) негіздеді. Сәуір айында ол сыртқы сауда саласында төтенше жағдай режимін енгізді, оның себебін импорт көлемінің экспорттан артып кетуі АҚШ-тың ұлттық қауіпсіздігіне қауіп төндіреді деп түсіндірді.

Еске сала кетейік, тамыз айында Ақ үй басшысы  енгізген импорттық тарифтер 65 елге қатысты күшіне енді. Бұл тізімде  Қазақстан да бар. Трамп Қазақстанға қарсы 1 тамыздан бастап 25 пайыздық баж салығын енгізу туралы Қасым-Жомарт Тоқаевқа хат жолдады. Мемлекет басшысы Дональд Трамптың Қазақстаннан импортталатын тауарларға баж салығын салу туралы хатына жауап берді.

39 мемлекет пен Еуропа одағы елдерінен әкелінетін тауарларға 15 пайыздық мөлшерлеме белгіленген. Тағы 26 елдің өнімдеріне 18 пайыздан 41 пайызға дейін баж салығы салынуда.

Қытай тауарларына салынған тариф 30 пайыз деңгейінде бекітілген. 6 тамызда АҚШ президенті Ресей мұнайын сатып алғаны үшін Үндістаннан әкелінетін өнімдерге қосымша 25 пайыздық баж салығын енгізу туралы жарлыққа қол қойды.

Қазақстаннан АҚШ-қа импорттық баж бойынша консультация алу үшін делегация жіберді.