«Төрт күндік тергеу»: Дуров француз билігінің айыптауына жауап қатты

Telegram негізін қалаушы Павел Дуров Францияда өзіне тағылған айыптар туралы алғаш рет пікір білдірді, деп хабарлады Orda.kz.

Павел Дуровты Парижде полиция төрт күн бойы тергеді. Дуров француз билігінің әрекетіне таңданыс білдіріп, Telegram-ның Еуропалық Одақта ресми өкілі бар екенін және ресми сұрауларға жауап беруге әрдайым дайын екенін атап өтті.

Дуров өзінің telegram арнасында компанияның әрдайым диалогқа ашық екенін және реттеуші органдармен ынтымақтастыққа дайын екенін айтты. Алайда принциптерін бұзатын нарықтан кетуге дайын екенін де ескертті. Мысал ретінде ол Ресейге шифрлау кілттерін беруден бас тартуын және Ирандағы наразылық білдірушілерді қолдағаны үшін Telegram-ның бұл елде бұғатталғанын мәлімдеді.

Соңында Telegram негізін қалаушы компанияның қылмыспен күресу үшін қосымша шаралар қабылдайтынын, бірақ олардың басты мақсаты — пайда емес, адам құқықтарын қорғау екенін атап өтті.

Еске сала кетсек, Orda.kz Ресей, Франция және Қазақстан билігі мен Дуровтың арасы жайлы саралап көрген болатын.