Тоқаевтың тапсырмасы бойынша дағдарысқа қарсы жаңа шаралар қабылданды

Қазақстан Үкіметі баға тұрақтылығын қамтамасыз етуге, халық пен бизнесті қолдауға бағытталған кешенді шешімдер қабылдады. Бұл шаралар Мемлекет басшысының тапсырмасы бойынша жүзеге асырылады, деп хабарлайды Orda.kz.

Бағаның өсуін тежеу және салық жүктемесін жеңілдету мақсатында қабылданған мораторийдің негізгі бағыттары мынадай: 

 • 16 қазаннан бастап АИ-92 маркалы бензин мен дизель отынының бағасын одан әрі көтеруге мораторий енгізіледі.

 • Осы күннен бастап коммуналдық тарифтердің өсуі де 2026 жылдың бірінші тоқсанының соңына дейін тоқтатылады. Барлық жоспарланған жөндеу мен жаңғырту жұмыстары белгіленген мерзімде орындалуы тиіс. Әлеуметтік осал топтарға көмек ретінде тұрғын үй беріледі.

• Шағын және орта бизнестің салығы жеңілдетіледі. Жаңа Салық кодексінен артық шектеулер алынып тасталады. Шағын бизнесті салық органдары тексермейді, сондай-ақ камера бақылауы да уақытша тоқтатылады.

•  Жеңілдетілген несие көлемі 500 млрд теңгеге дейін, яғни екі есе ұлғайтылатын болды. Ақша «Наурыз» және «Наурыз-Жұмыскер» бағдарламаларына беріледі. «Әскери баспана» бағдарламасы да қайта басталады. Құрылыс компаниялары алдағы үш жыл бойы бағаны көтермеуге міндеттелді.

 • 2026 жылдың 1 сәуіріне дейін негізгі қарызын өтеген кәсіпкерлердің салық бойынша өсімпұлы мен айыппұлы кешіріледі.

 • ҚҚС тіркеу шегін асып кеткен салық төлеушілер әкімшілік жауапкершілікке тартылмайды.

 • Жеңілдетілген автонесие беру бағдарламасы жалғасады. Бұдан бөлек, азаматтарға арналған жеңіл автокөлік сатып алу үшін лизинг тетігі енгізіледі.

Қабылданған шаралар халықтың әлеуметтік жүктемесін жеңілдетуге, кәсіпкерлікті қолдауға және экономикалық тұрақтылықты нығайтуға бағытталған.

Айта кетейік, кеше ғана президент Қасым-Жомарт Тоқаев Үкіметке шағын және орта бизнесті қолдауға, инвестициялық ахуалды жақсартуға және елдегі экономикалық жағдайды тұрақтандыруға бағытталған шаралар әзірлеуді тапсырған еді.