Тәжікстан Қазақстанға гуманитарлық көмек жіберді

Сарыағашта су тасқынынан зардап шеккен тұрғындарға гуманитарлық көмек тапсырылды.

Тәжікстан билігінің хабарлауынша, гуманитарлық жүкті Төтенше жағдайлар комитетінің басшысы Абдухалим Назарзода өзі тапсырған. Ол өз сөзінде президент Эмомали Рахмонның тапсырмасымен қазақ халқына көмек көрсетілгенін атап өтті. Қазақстан төтенше жағдайлар министрінің бірінші орынбасары Тәжікстанға алғысын білдірді.

«Дүшанбе мен Худжандтан азық-түлік, ауыз су, құрылыс материалдары мен үйлердің шатырын жабатын гуманитарлық көмек жөнелтілді. Жалпы салмағы 3,5 мың тонна болатын 61 вагон мен 13 жүк көлігі жөнелтілді» делінген Тәжікстан ТЖК мәлімдемесінде.

Еске салайық, 12 наурызда Қазақстанның Душанбедегі елшісі Уәлихан Төреханов тәжік тарапына 15 мың тонна мазут алу сертификатын тапсырған болатын. Жанармай Тәжікстанға гуманитарлық көмек ретінде жөнелтілді.