Тараздағы жарылыста қаза тапқан өрт сөндірушінің құрметіне ескерткіш орнатылады

Таразда жарылыс кезінде қаза тапқан Жамбыл облысы төтенше жағдайлар департаменті өрт сөндіру және авариялық-құтқару жұмыстары қызметі бастығының орынбасары, «Халық Қаһарманы» атағы берілген Мейіржан Аймановқа ескерткіш қойылады.

Бұл туралы Orda.kz хабарлайды.

Ескерткішті орнату туралы бастаманы өңір әкімі Бердібек Сапарбаев қаза тапқандардың отбасына мемлекеттік наградаларды тапсыру кезінде айтты.

Мейіржан Аймановтың туыстары бұл бастаманы қолдады.

- Олар болашақ ұрпаққа үлгі болуы үшін, адамдар ұмытпауы үшін ескерткіш қойғысы келетіні дұрыс. Оның балалары аман болсын. Олар әкесімен мақтанатын болады. Екінші және үшінші ұлдары өрт-құтқару спорты бойынша жарыстарға қатысып, оның ізімен жүруді армандайды, - деді Мейіржан Аймановтың анасы.