СҚО-да жас жігіт жұмысының ақысын төлемей жүрген ауылдасын атып өлтірді

Қайғылы оқиға Солтүстік Қазақстан облысы Тимирязев ауданы Докучаево ауылында болды. Жергілікті тұрғын мас кезінде жалақысын төлемей жүрген фермерді атып өлтірді, деп хабарлайды Orda.kz.

Мессенджерлерде таратылған хабарламаларда айтылғандай, ауыл тұрғыны қатты ішіп алып, жергілікті фермердің үйіне келген. Бұл оқиға 31 қазан күні сағат 22: 00-де болған. Оның келгендегі себебі ала-алмай жүрген жалақысын сұрау еді.

«Докучаево ауылының тұрғыны «БурБат» ЖШС директорының үйіне істеген жұмысының ақысын қашан төлейтінін білу үшін келген. Кәсіпкер үйінен оқталған мылтығын алып шығып, қорқыту үшін ауаға оқ атқан. Жұмыскер оның мылтығын жұлып алып, басынан және ішінен екі рет атып жіберген» деп жазылды ғаламторда таратылған хабарларда. 

Алған жарақатынан фермер қайтыс болды. Ауыл тұрғыны қашып кетпей, полицияны күтіп отырған.

«Оқиға кең резонанс туғызды. 22 жастағы күдікті ұсталды. Полиция Докучаев ауылының 52 жасар тұрғынының қазасының себебін анықтауда», деп хабарлады облыс әкімдігінің баспасөз қызметі. 

Аудан әкімі марқұмның отбасына көңіл айтты.

Еске салсақ, Бас прокуратураның Құқықтық статистика және арнайы есепке алу комитетінің Қылмыстық қатерлер мен қоғамдық қауіпсіздік тәуекелдерін болжау орталығы жұмысқа орналастыру саласындағы қылмыскерлердің белсенділігінің артында құлдыққа түсу қаупі бар екенін ескертті.