Шудағы жүкті әйелдің өлімі: тергеу басталып, бірнеше дәрігер жұмыстан кетті

Жамбыл облысында жүкті әйелдің өліміне  қатысты тергеу басталды, деп хабарлайды Orda.kz. 

Бұл туралы денсаулық сақтау министрлігінің баспасөз қызметі мәлімдеді. 

Еске салайық, Шу қаласындағы көпбейінді ауруханада ана мен бала өлімі тіркеліп, қоғамда үлкен резонанс тудырды. Перзентханаға өз аяғымен барған 26 жастағы Әдемі Ешенәлиева сәбиімен қоса жұмбақ жағдайда көз жұмды. Осы оқиғаға байланысты денсаулық сақтау министрлігінің медициналық және фармацевтикалық бақылау комитеті Шу ауданының емханасы мен ауданаралық орталық ауруханасына қатысты тергеу бастады. 

Тергеу жүргізу кезеңінде Шу ауданының ауданаралық орталық ауруханасының бас дәрігері мен перзентхана бөлімшесінің меңгерушісі қызметінен шеттетілді. Ал Жамбыл облысы денсаулық сақтау басқармасы басшысының міндетін атқарушы Е. Мұсабаев тәртіптік жауапкершілікке тартылды.

Енді денсаулық сақтау министрлігінің комиссиясы медициналық көмек көрсету стандарттарын қалыпқа келтіру үшін Жамбыл облысының барлық босандыру ұйымдарына мониторинг жүргізбекші. 

Айта кетейік, Павлодарда ақша жымқырған жүкті әйел мейрамхананы «бомбалады».