Шерхан Қалмұрзаға ғылым министрі грант табыстады

«Қайрат» футбол клубының 18 жастағы қақпашысына ғылым министрі Саясат Нұрбек грант берді, деп хабарлайды Orda.kz.

Министр Саясат Нұрбек Шерхан Қалмұрзамен кездесіп, оған Қазақ спорт және туризм академиясында оқу үшін ректорлық грант табыстады.

«Жас қақпашының көрсеткен тарихи нәтижесі – барша қазақстандық жастар үшін жарқын үлгі. Осы жетістігімен құттықтаймын және алдағы матчтарда сәттілік тілеймін!» – деді министр.

Еске сала кетейік, «Қайрат» футбол клубы Чемпиондар лигасына шыққаннан кейін «Ақтөбеге» қарсы матчта қақпашы Темірлан Анарбеков жарақат алып, алаңнан кеткен болатын. Сол кезде қақпаға Шерхан Қалмұрза шығып, матчты толық өткізді.

Кейін ол Чемпиондар лигасында «Спортинг» пен «Реал Мадридке» қарсы ойнап, жанкүйерлердің назарына ілікті. Бұдан соң оған кәсіпкер Ұлықбек Шәріпов көлік сыйлады.