Scat-тың Тараз – Екатеринбург рейсінің жолаушылары кешеден бері ұша алмай отыр

Scat әуе компаниясының Тараз – Екатеринбург рейсінің жолаушылары кеше кештен бері әуежайда отыр, деп хабарлайды Orda.kz. 

Алғашында жолаушыларға ұшақтың ұша алмауы ауа райы салдарынан деп мәлімдеген. Кейінірек борттық компьютердің істен шыққаны айтылған. 

Жолаушылардың айтуынша, рейс кеше сағат 17:30-да ұшуы тиіс болған. Кейін ұшу уақыты 22:00-ге ауыстырылған. Сол уақытқа дейін мамандар электрониканы жөндеуге тырысқан, алайда нәтиже болмаған. Осыған байланысты қажетті қосалқы бөлшектерді Алматыдан алдыртқан. Жолаушыларға күту керек екені айтылған. Алайда қанша уақыт екені белгісіз.

Әуе компаниясы жолаушыларға тек тамақ қана ұсынған. Сондықтан Таразда тұрып қалған жолаушылар түнді тікелей әуежайда өткізуге мәжбүр болған.

Сонымен қатар, Scat әуе компаниясы тарапынан ешқандай ресми мәлімдеме жасалмаған. Компанияның баспасөз қызметімен байланысу да мүмкін болмаған.

Айта кетейік, Шымкентте жолға таласып кісі өлтірді деген күдікпен төрт адам ұсталды.