«Ресей жауынгерлеріне саулық тілеймін»: Қазақстанда концерттері өтпей қалған әнші мәлімдеме жасады

Қазақстандағы даудан кейін ресейлік әнші Акмаль (Akmal) Ресей әскерилерін қолдайтынын айтып, оларға амандық пен саулық тіледі, деп хабарлайды Orda.kz.

Бұған дейін Петропавлдағы концерт кезінде көрермен берген көк-сары түсті дорбаны алудан бас тартқан әншінің әрекеті залда наразылық туғызған еді. Ресейге оралған соң, ол соғысқа қатысты мәлімдеме жасады.

«Құдай біздің жауынгерлерге саулық берсін, бәрі жақсы болсын. Артымыздан кім не десе де, біз одан тек мықты бола түсеміз», – деді ол журналистерге берген жауабында.

Осы мәлімдемеден кейін Akmal-дың Қазақстанның екі қаласында өтеді деп жоспарланған концерттері тоқтатылды. Ұйымдастырушылар мұны «техникалық себептерге» қатысты деп түсіндіргенімен, жұрт бұл шешімді әншінің дау болған пікірлерімен байланыстырып отыр.