Полиция қызметкерлері жол апатына ұшырады

Солтүстік Қазақстан облысында екі полицей қызметтік көлікпен жол шетіне шығып кетті. Оқиға Көкшетау – Рузаевка республикалық трассасында таңғы сағат 5:55-те тіркелді, деп хабарлайды Orda.kz.

Айыртау аудандық патрульдік полициясының қызметкерлері күрделі бұрылысты өтіп бара жатып, жол шетіне шығып кеткен. Екеуі де жарақат алды. Дәрігерлердің жедел көмегі арқасында бір полицей жеңіл жарақатпен үйіне жіберілді. Ал әріптесі ауыр жарақат алып Петропавлға жеткізілді: оның саусақтары сынған, басынан да жарақат алған. Қазіргі жағдайы ауыр. Алдын ала мәлімет бойынша, апат кезінде полицейлер сау болған.

Айта кетейік, бірнеше күн бұрын СҚО-да тағы екі полицей дәл осылай қызмет бабында жол апатынан қаза тапқан еді. Кеше оларды әріптестері мен туыстары соңғы сапарға шығарып салды.