Мектеп оқулықтарын сараптауға ата-аналар да қатыса алады

Қазақстанның Оқу-ағарту министрлігі келесі оқу жылында мектептерде енгізілетін төртінші сынып оқулықтары жобаларын қоғамдық талқылауға шығарды, деп хабарлады Orda.kz.

Министрліктің баспасөз қызметі мұғалімдер, ата-аналар, қоғамдық ұйымдардың өкілдері және барлық бейжай қарамайтын азаматтар сараптамаға қатыса алатынын мәлімдеді. Бұл үшін Білім беру мазмұнын сараптау орталығының bmso.kz сайтында өз пікірін білдіруге мүмкіндік бар. Қоғамдық талқылауға мына оқулықтар ұсынылған: қазақ тілінде оқытатын мектептерге арналған «Орыс тілі», «Еңбекке баулу», «Бейнелеу өнері», шетел тілдері (ағылшын, неміс, француз), сондай-ақ «Цифрлық сауаттылық» пәні бойынша электронды оқулық.

Барлық аталған оқулықтар қазір 31 пилоттық мектепте сынақтан өтіп жатыр.

«Қолданыстағы заңнамаға сәйкес, оқулықтар бес кезеңнен тұратын сараптамадан өтеді. Ғылыми-педагогикалық сараптама, пилоттық мектептерде сынақтан өткізу, қоғамдық-педагогикалық талқылау, пәндік сараптама комиссиясының қарауы жүргізіледі» деп жазылған баспасөз хабарламасында. 

Оқулықтар барлық сараптама кезеңінен өткеннен кейін, олар барлық мектептерге ұсынылып, Оқу-ағарту министрлігі бекітетін тізімге енгізіледі.