Мәжіліс букмекерлік кеңселерді жарнамалауға тыйым салуға шешім қабылдады

Мәжіліс депутаттары букмекерлік кеңселерді жарнамалауға тыйым салатын заң жобасын екінші оқылымда қабылдады.

Блогерлер мен инфлюенсерлерге, сонымен қатар басқа да қазақстандықтарға букмекерлік кеңселер мен онлайн казиноларды жарнамалауға тыйым салынады. Бұл үшін 200 мың теңге айыппұл қарастырылған.

«Бүгін қоғамымызға тікелей әсер ететін өте маңызды заң жобасын қабылдап отырмыз. Атырауда өткен Ұлттық құрылтайда Президент лудоманияны XXI ғасырдағы басты әлеуметтік зұлымдық деп атады. Мемлекет басшысының тапсырмасы бойынша, ойынға тәуелділікпен күресудің кешенді жоспары қабылданды»,- деді депутат Елнұр Бейсенбаев. 

Заң букмекерлік кеңселер мен онлайн казино ғимараттарда, құрылыстарда және көлік құралдарында сыртқы жарнамасына, сондай-ақ олардың бұқаралық ақпарат құралдарында, кино, бейне және анықтамалық қызметтерде жарнамасына толығымен тыйым салады. Жарнама букмекерлік кеңселер мен онлайн казино орналасқан жерінде, спорт ғимараттарының ішінде, спортшылар жабдықтарында, спорттық теле және радиоарналарда, спорттық іс-шараларды көрсетуге мамандандырылған интернет-ресурстарда рұқсат етіледі.

Бұл ретте отандық телеарналар халықаралық спорт жарыстарын тікелей трансляциялау кезінде букмекерлік кеңселер мен ұтыс ойынын жарнамалай алады. Сонымен қатар, түзетулер ұялы байланыс операторларына электронды казинолар, онлайн-казинолар, сондай-ақ халықтың абоненттік құрылғыларына құмар ойындар мен бәс тігулер туралы жарнаманы қамтитын мәтіндік хабарламаларды жіберуге тыйым салуды көздейді.