Қытай шекараcында тағы да дүрбелең: тасымалдаушылардың рұқсаты таусылды

Қазақстан-Қытай шекарасында Қытайға бара жатқан жүздеген жүк көлігі тұрып қалды, деп хабарлайды Orda.kz.

 Мемлекеттік кірістер комитеті түсіндіргендей, кептелістердің негізгі себебі - қазақстандық тасымалдаушыларда шекарадан өту үшін қажетті шетелдік рұқсат бланкілері таусылған.

 Қазір ведомство Көлік министрлігімен бірлесіп қытай тарапымен қосымша рұқсат беру туралы келіссөз жүргізуде. ҚХР қабылдайтын машиналар санын уақытша ұлғайтуға және өткізу пункттерінде кедендік ресімдеуді жеделдетуге келісіп жатыр.

 Тасымалдаушылардың шығындарын азайту үшін CarGoRuqsat электронды кезегіндегі брондау мерзімі 72 сағатқа ұзартылды.

 «Бұл тасымалдаушыларға жүйенің жаңартылған жұмыс қағидаларымен белгіленген 20 АЕК көлеміндегі кепілді жарна мен брондау үшін бұрын енгізілген бір АЕК-ті сақтауға мүмкіндік береді» деп жазылған хабарламада. 

Рұқсаттардың жаңа топтамасы келіп түскеннен кейін жүргізушілер құжаттарын бұрын броньдалған кезек бойынша рәсімдей алады. МКК тасымалдаушыларды жағдай қалыпқа келгенше өткізу пункттеріне бармауға шақырды.

 Бұған дейін біз Қаржы министрлігі жүк көлігін шекара мен электронды кезек жүйесі арқылы өткізу үшін төлемақының жаңа мөлшерлерін бекіткенін жазғанбыз. Енді жүк көліктері брондау кезінде бір АЕК (3 932 теңге) төлейтін болған.

Жақында мәжілісмендердің үкіметтік жеңілдіктерді пайдаланып отырған шетелдік компаниялар қазақстандық кәсіпкерлерді нарықтан ығыстырып жатқанын, ал олардың үлесі қазірдің өзінде 25%-дан төмендеп кеткенін айтып мәселе көтерген болатын.

Сонымен қатар биылдан бастап еліміздегі сары түсті автонөмірлер жойылады, себебі  шетелдіктер отандық тасымалдаушыларға арналған жеңілдіктер мен квоталарды пайдаланып келген.