Қырымда украиндық олигархтардың мүлкін сату басталды

Қырымда украиндық кәсіпкерлердің мүлкін сату бойынша алғашқы аукциондар өтті. Жергілікті шенеуніктердің хабарлауынша, кезекте Украина президенті Владимир Зеленскийдің пәтері тұр.

Бірқатар ресейлік БАҚ ресейлік шенеуніктің Telegram-арнасына сілтеме жасап, Қырымда украиндық олигархтардың мүлкінің алғашқы аукционы өткенін хабарлады.

Ақпаратқа сүйенсек, сегіз аукцион өткізіліп, онда жалпы сомасы 815 миллион рубльден асатын (4 миллиард теңгеге жуық) коммерциялық жылжымайтын мүлік пен тұрғын үйлер сатылған. Сонымен қатар, жалпы құны 27 миллион рубль болатын тағы төрт тұрғын үй ашық аукционға шығарылды.

Жақын арада украиндық олигархтардың тағы жүзге жуық нысаны аукционға шығарылатыны атап өтілді. Оның ішінде Зеленскийдің Ливадиядағы 100 шаршы метрлік пәтері бар. Олар бұл нысандарды сатудан 800 миллион рубльден астам пайда күтуде.

Бұған дейін Қырымда көптеген олигархтардың мүлкі тәркіленгені, олардың арасында Арсений Яценюк, Ринат Ахметов, Нестор Шуфрич, Сергей Тарута және т.б. бар екені хабарланған болатын. Сатудан түскен қаражатты әскерлердің қажеттіліктеріне жұмсау жоспарлануда.