Құлыбаевтың Halyq Bank-і «халық» сөзін заңсыз пайдаланып жүр — депутат

Мәжіліс депутаты Марат Бәшімов Halyq Bank атауына «халық сөзін» қолдану заңға қайшы деп есептейтінін айтты, деп хабарлайды Orda.kz.

Мәжіліс отырысында депутат Марат Бәшімов Halyq Bank атауы азаматтарды шатастыруы мүмкін екенін айтып, банк атауынан «Халық» сөзін алып тастауды ұсынды. Оның пікірінше, «халық» сөзі – Конституциялық ұғым, сондықтан оны жеке меншік құрылымдар пайдаланбауы тиіс.

«Менен бір сарапшы сұрады: «Неге Halyq Bank-ке «халықтың банкі» деген атауды беріп қойғансыздар?»,- дейді. Азаматтық кодексте Қазақстан Республикасы атынан атау қоюға тыйым бар. «Халық» деген ұғым – Конституциялық термин. Халық атынан сөз сөйлеп, көпшілікке шыға алтын тұлғалардың саны шектеулі. Ал бұл банк халықтың атын өздеріне алған, «Халықтың банкіміз» деп елді шатастырып жүр. Қарапайым адам «Халық банк» деген халықтың банкі екен деп ойлайды. Кешіріңіз, кім оған ондай атау қоюға рұқсат берді? Әділет министрлігі осыған кірісіп, атауды қайта қарап, талқылауға шығару керек. Ол «халық» сөзін қолдана алмайды. Өйткені бұл –конституциялық термин. Әділет министрлігі қорытынды берсін», — деді депутат.

Бұл ұсынысқа жауап берген Қаржылық мониторинг агенттігінің төрағасы Мәдина Әбілқасымова мәселе заңнамалық тұрғыдан тексеруді қажет ететінін атап өтті.