Құлыбаевтар Halyk Bank-тегі үлестерінің бір бөлігін сатпақ

«АЛМЭКС» холдингі, яғни Halyk Bank акцияларының шамамен 70 пайызына иелік ететін компания, банктың төрт пайызға жуық үлесін нарыққа шығаратынын мәлімдеді. Қазіргі бағаммен есептегенде құны 159 млрд теңге шамасында болады, деп хабарлайды Orda.kz.

Сатылымға кемінде 12 млн жаһандық депозитарлық қолхат қойылады. Әрбірінің құны — 40 қарапайым акцияға тең.

Инвесторлардан өтінім қабылдау қазақстандық және халықаралық нарықта қатар жүргізіледі. ЖДҚ Лондон қор биржасында (LSE), сондай-ақ AIX пен KASE сайттарында орналастырылады. Қазақстанда банктың қарапайым акциялары да ұсынылады.

Halyk Bank бұл мәміледен қосымша қаржы алмайды. Себебі сатылатын бағалы қағаздар толығымен қазіргі акционерге тиесілі.

Акцияларды орналастыруды Citigroup Global Markets, J.P. Morgan Securities және Halyk Finance ұйымдастырып отыр. «АЛМЭКС» бұл қадам арқылы акцияларды көп адам сатып алатындай етіп, жаңа инвесторларды тартуды көздеп отыр. Егер сұраныс көп болса, ұсынылатын акциялар саны ұлғаяды.

Бұған дейін холдинг мұндай үлес сатуды қалыпты нарықтық тәжірибе деп атаған.

2025 жылдың тоғыз айының қорытындысы бойынша Halyk Bank-тің таза пайдасы 809,9 млрд теңгеге жетті. Бұл өткен жылмен салыстырғанда 27 пайызға жоғары. Пайдаға несие беру, комиссиялық түсімдер және сақтандыру бағыты елеулі үлес қосты. Банк активтері 20,4 трлн теңгеден асты.

Бұған дейін мәжіліс депутаты Марат Бәшімов Halyq Bank атауына «халық сөзін» қолдану заңға қайшы деп есептейтінін айтты. Оның айтуынша, «халық» сөзі кейбір салымшыларды шатастыруы мүмкін. АРРФР төрайымы Мәдина Әбілқасымова бұл мәселенің құқықтық жағы қаралатынын айтты.