Құлсарыда 7 жастағы қызды зорлап өлтірген ер адам өмір бойына сотталды

Атырау облысының қылмыстық істер жөніндегі мамандандырылған ауданаралық сотында судья Зарема Хамидуллина Құлсарыда болған қанды қылмысқа кінәлі адамды өмір бойына бас бостандығынан айырды, деп хабарлайды Orda.kz. 

Қайғылы оқиға 2025 жылдың 5 маусымында болған еді. 7 жастағы қыз достарымен ойнап, үйге қайтар жолда сотталушымен кезігіп қалады. Сол маңдағы бейнекамераға ер адам мен қыздың бір бағытта кетіп бара жатқаны түсіп қалған.

Мас ер адам қызды зорлап, қылмысын жасыру үшін оны өлтіреді. Қыздың денесі 12 сағаттан кейін Құрсай өзенінің маңынан табылды.

Тергеу мәліметінше, 35 жастағы ер адам қыздың денесінен «құтылғаннан» кейін, дүкеннен ішімдік сатып алып, досының ауласында ұйықтап қалған.

Сот-медициналық сараптама ұрып-соғу, жыныстық зорлық-зомбылық және күштеп суға батыру белгілерін анықтады. Сотталушы кінәні мойындамады. Бірақ оның кінәсі куәгерлердің айғақтарымен, бейнежазбалармен және сараптама нәтижелерімен толық дәлелденді.

Сот үкімімен ер адам өмір бойына бас бостандығынан айырылды.

Сот жәбірленушінің пайдасына 20 000 000 теңге өндіріп алды. 

Айта кетейік, Қарағандыда 15 жастағы қызбен неке қиған мұғалім 17 жылға бас бостандығынан айырылды.