Қостанай облысында интернет-алаяқтарға SIM-карталарын қосып беріп отырған тұрғын ұсталды

Қостанай облысында интернет-алаяқтарға арналған телефон нөмірлерін беріп отырған дропер анықталды. 26 жастағы жергілікті тұрғын интернет-алаяқтар үшін SIM-карталарды белсендірумен айналысқан, деп хабарлайды Orda.kz.      

Күдіктіні Қостанай облысы полиция департаментінің киберқылмысқа қарсы іс-қимыл басқармасы қызметкерлері анықтап, ұстады.

Жұмыс жүйесі қарапайым болған, әйел белсендірілген мобильді нөмірлерге WhatsApp мессенджерінде аккаунттар тіркеп отырған.

Кейін ол сол аккаунттарға қолжетімділікті алаяқтарға берумен айналысқан. Ал олар өз кезегінде банк және құқық қорғау органдары қызметкерлері ретінде танысып, азаматтарды қорқытып, ақша бопсалаған.

Телефон алаяқтарының сыбайласы төлемді криптовалюта түрінде алып, кейін қаражатты өз банктік шоттарына шығарып отырған.

Оның пәтерінде тінту жүргізілді. Нәтижесінде 6 ұялы телефон, 3 планшет және әртүрлі байланыс операторларының 400 SIM-картасы тәркіленді.

«Алаяқтық фактісі бойынша қылмыстық іс қозғалды. Қазіргі уақытта тергеу әрекеттері жүргізіліп, оқиғаның барлық мән-жайы және ықтимал сыбайластары анықталуда», деп хабарлады Қостанай облысы полиция департаменті. 

Оқи отырыңыз:

• Қазақстанда интернет-алаяқтық 25%-ға артты
• Түркістан облысы арнайы прокурорлары шетелдіктердің интернет-алаяқтық фактісі бойынша тергеп-тексеруді аяқтады
• Алматыда алаяқ жұп 41 адамның сыртынан несие алған