Конституцияның 30 жылдығына орай рақымшылық жасау аясында екі мыңнан астам адам бостандыққа шықты

2025 жылғы рақымшылық жасау қорытындысы бойынша екі мыңнан астам сотталушы бостандыққа шықты, тағы 15 мыңнан астам адамның жазасы жеңілдетілді, деп хабарлайды Orda.kz.

ҚР ІІМ Қылмыстық-атқару жүйесі комитеті хабарлағандай, соттар 16 мыңға жуық ұсыныс қараған. ҚАЖ мекемелерінен екі мыңнан астам адам босатылды, 11 мыңнан астам адамға бас бостандығынан айыру мерзімі қысқартылды. 

Рақымшылық жасау пробация қызметінде тіркелгендерді де қамтыды. Жазадан 2888 адам босатылды, 7600-ге жуық адамның соттылығы қысқартылды.

Қылмыстық-атқару жүйесі комитетінің хабарлауынша, рақымшылыққа бірінші кезекте әлеуметтік осал санаттар: кәмелетке толмағандар, балалы әйелдер, жүкті әйелдер, егде адамдар және мүгедектігі бар азаматтар жатады. Әңгіме онша ауыр емес және ауырлығы орташа қылмыстар туралы болып отыр. Ауыр зорлық-зомбылық, террористік және сыбайлас жемқорлық қылмыстар рақымшылыққа ілікпейді.

Заң 2025 жылғы маусымда күшіне енді. Босатылғандардың барлығы пробациялық бақылауда және полицияда жеке есепке алынған. Ведомство атап өткендей, рақымшылық жасау пенитенциарлық жүйеге түсетін ауыртпалықты азайтып, адамдардың бейімделуі мен қалыпты өмірге оралуына баса назар аударатын адамгершілікке жасалған қадам.

Жыл басында ішкі істер министрлігі бюджетті үнемдеу сақсатында екі мыңнан астам сотталған әйелге рақымшылық жасау бастамасын қолдаған болатын. Сотталған әйелдерге рақымшылық жасау күн сайын 5,8 миллион теңге, ал жылына 2,1 миллиард теңге бюджет қаражатын үнемдеуге мүмкіндік береді.

Тақырыпқа қатысты оқи отырыңыз:

• Депутат сотталған әйелдерге рақымшылық жасауды ұсынып отыр
• Рақымшылыққа іліккен Жомарт Ертаев бостандыққа шықты
• Шерзат ісімен сотталғандардың бірі рақымшылыққа ілінуі мүмкін