Қомақты қаражат пен пәтер ұтысы туралы call-орталық арқылы хабарлаған алаяқтар ұсталды

Астанада ірі «ұтыс» туралы хабарлап, ақша сұрап жүрген алаяқтық байланыс орталығы жойылды, деп хабарлайды Orda.kz Polisia.kz сайтына сілтеме жасап.

Алаяқтық байланыс орталығы астаналық бизнес орталықтарының бірінде орналасқаны бегілі болды.

«Алаяқтар өздерін «Technosmart», «Bison», «Like me shop» интернет-дүкендерінің қызметкерлеріміз деп таныстырып, ұтып алған көлік пен пәтерге салық аудару туралы хабарласқан.

Жедел іс-шара барысында кеңсенің алты қызметкері ұсталды, олардың барлығы Қазақстан азаматтары. Жеті ноутбук, роутер және Wi-Fi тәркіленді», деп мәлімдеді полиция.

Сонымен қатар, хабарланғандай, Жетісу өңірінде полиция қызметкерлері ҰҚК қызметкерлерімен бірлесе отырып, интернет-алаяқтық үшін sim-box құрылғыларын пайдаланғанын анықтады.

Алаяқтық байланыс орталығы Астанадағы бизнес орталықтарының бірінде орналасқан.

Тінту кезінде 96 ұясы бар жеті sim-box құрылғысы, қазақстандық ұялы байланыс операторларының 50 мыңнан астам сим-карталары, жеті ұялы телефон, екі ноутбук, сондай-ақ қаңтар оқиғасы кезінде ұрланды деген екі ИЖ-53 пневматикалық тапаншасы мен төрт әскери каска тәркіленді.

Аталған фактілер бойынша сотқа дейінгі тергеу амалдары басталды.

 «Жалпы биылғы жылы киберқылмысқа қарсы күрес бөлімдерінің қызметкерлері 64 sim-box құрылғысын алаяқтықпен пайдалану фактілерін анықтап, жолын кесті, отандық ұялы байланыс операторларының 90 мыңға жуық SIM картасы тәркіленді», - деп қосты полиция.