ҚМБД даулы жағдайларға қатысты мәлімдеме жасады

ҚМБД бас мүфтиінің кеңесшісі қоғамда қызу талқыланған даулы оқиғаларға байланысты пікір білдіріп, жеке мұсылманның қателігін дінмен байланыстыру қате екенін айтты, деп хабарлайды Orda.kz.

Бас мүфти кеңесшісі, ұстаз Смайыл Сүйерқұлұлы ҚМБД дін мен дәстүрді сабақтастырып насихаттап келе жатқанын айтты. Оның сөзінше, жеке бір мұсылманның қателігін тұтас діннің кемшілігі ретінде көрсету — қате түсінік. Ол Құрбанәлі Ахметтің айналасындағы жағдайға да тоқталып, оның ҚМБД-ға қатысы жоқ екенін мәлімдеді.

«Ислам діні — кәміл дін, дінде кемшілік жоқ, кемшілік пендеде. Мұсылман адамның жасаған өрескел ісі немесе қателігі үшін ислам дінін қаралаудың қажеті жоқ. Соңғы күндері елімізде болып жатқан жағдайларға ҚМБД алаңдаушылық білдіреді. Кейбір адамдардың әрекетін діннің немесе ҚМБД-ның атынан жасалған деп қабылдау дұрыс емес», — деді ол.

Сондай-ақ, Смайыл Сүйерқұлұлы әлеуметтік желіде тараған Құрбанәлі Ахметке қатысты даулы подкастқа пікір білдірді. Айтуынша, исламда ерлі-зайыптылар өзара түсінісе алмаған жағдайда ажырасуға рұқсат етіледі. Алайда, шариғатта әйеліне әдейі ажырасып, басқа адамға тұрмысқа шығуын талап ету деген түсінік жоқ. Сонымен қатар, ол Құрбанәлі Ахметтің ҚМБД-да жұмыс істемейтінін және оның муфтиятпен ешқандай байланысы жоқ екенін атап өтті. Бұдан бөлек, ҚМБД өкілі Наурыз мерекесін тойлау ұлттық құндылық ретінде бағаланатынын жеткізді.

Оқи отырыңыз:

Баян Алагөзова: Радикализм, «Алтын Ханым» және әл-Фарабидегі апаттар

Ермұрат Бәпи: Өз әйелін хайуан ұқсатып, сыйға беру — қылмыс

Наурыз мерекесін тойламауға шақырған азамат ұсталды: Қылмыстық іс қозғалды