ҚазҰУ ректоратының 14-қабатынан студент секіріп, қаза тапты

Әл-Фараби атындағы Қазақ ұлттық университетінің бірінші курс студенті ректорат ғимаратының 14-қабатынан секіріп, көз жұмды, деп хабарлайды Orda.kz.

Қайғылы жағдай 30 шілде күні күндіз болған. Дереккөздердің мәліметінше, «Шығыстану» факультетінің «Түркология» мамандығында оқитын студенттің мұндай қадамға баруына оқуда қалу немесе оқу ақысын төлеу мүмкіндігінің болмауы себеп болуы мүмкін.

Orda дереккөзі хабарлағандай, университет әкімшілігі оқиға туралы ақпараттың сыртқа таралмауы үшін қызметкерлердің телефонында фото немесе видео бар-жоғын тексерген. 

«Кешкі сағат 18:00-ге дейін ректораттың есігі ішкі жағынан жабылып, сырттан ешкім кіргізілген жоқ. Жұмысшылардың телефондарын да тексеріп жатты», – деді дереккөз. 

Алматы қалалық полиция департаментінің мәліметінше, студенттің бұл әрекетіне отбасылық қиындықтар түрткі болуы ықтимал. 

«Бостандық ауданының полиция басқармасы Қылмыстық кодекстің 105-бабы бойынша іс қозғады. Оқиғаның мән-жайы мен себептері анықталуда», деп хабарлады ведомство. 

Еске салайық, бұған дейін Алматыдағы Мақан Есболатов атындағы ІІМ академиясында бір топ ата-ана наразылық танытқан еді. Олар жоғары балл жинаған балаларының мемлекеттік грантқа іліге алмағанын айтып, әділдік талап еткен. Ата-аналардың айтуынша, ҰБТ-дан шекті деңгейден енді асқан, 50–55 балл алған талапкерлер оқуға қабылданып жатқанда, 70 балл жинаған кейбір үміткерлер академияға түсе алмаған.