«Қазақстаннан кетемін»: Талғарда қаза тапқан Шерзаттың әкесі

Талғарда қаза тапқан 16 жастағы Шерзат Болаттың әкесі Қаржаубай Нұрымов әлеуметтік желілер мен бұқаралық ақпарат құралдарында тараған видео мен жарияланымдардан кейін күйінішпен мәлімдеме жасады, деп хабарлайды Orda.kz.

Нұрымовтың анасы да бейнежазба түсірді. Оның айтуынша, төбелеске қатысты видеолардың монтаждалған үзіктері әдейі жарияланып, оны отбасының абыройын түсіру үшін таратып отыр.

Қаржаубай Нұрымов отбасын аман-есен Алматы облысынан алып кетуге мұрша беруді сұрады. Ол желіде өзінің пышақ ұстап келгендерге қарсы, қорғану үшін пышақ алып шыққанын түсіндірді. Сөзінің соңында талабы орындалмаса, басқа мемлекетке кететінін айтты.

«Ассалаумағалейкум, қазақ елі! Мен бұл жерде ешқандай ақталып, болмаса баламды ақтап, інімді ақтап тұрған жоқпын бұл жерде. Қорқып... Шыны керек, қайғы-қасіреттен шаршадым. Мен тек әділ сот болғанын қалаймын. Егер менің кінәм болса, мені кінәласын. Бауырымның кінәсі болса, бауырымды кінәласын. Ал менің ұлымды өлтірген адамды әділ жазаға кессін. Бірақ қазақ елінен сұрайтыным, мен ақты ақ, қараны қара деп, келген жігіттерге де, бәріне де айттым. Менің баламның жарақаттарын да жасырмақ болды... Мен ештеңеге таң қалмаймын қазір. Сол үшін өтініп сұрайтыным ешқандай митингі болып, мені қаралап, менің отбасымды қаралаудың қажеті жоқ. Менің баламды өлтірген адамдардың әкелері ер-азамат болса -  менің алдыма келер еді. Tik-tok-та, болмаса instagram-да үлкен кісілерді алдыға салып қойып, болмаса үйге әйел адамдарды жіберіп... Мұндай дүрбелең болып, мұндай әңгімеге бармайтын едік. Сол себепті менің айтатыным, біздің президенттен сұрайтыным, министрден сұрайтыным, менің отбасыма тыныштық беруін сұраймын және де отбасымды бұл Алматы қаласынан аман-есен алып шығып кетуім керек. Қалған жағында сот созылатыны мәлім. Айдан анық. Маған келіп жатқан адамдар да, кетіп жатқан адамдар да, менен интервью алып жатқан адамдар да бар,  мен тек адвокаттарыма, осы заңгерлеріме сенемін. Олардың да бала-шағасы бар. Осындай жағдай бәрінде болып жатыр. Мен шыны керек, өзім үшін қорықпаймын. Атып кетсе де, пышақтап кетсе де, соттатып жіберсе де... Сол үшін айтарым, тек  отбасымның амандығы керек. Бауырым әке-шешем, бала-шағам, соларды мен Алматы қаласынан, Алматы облысынан алып шығып кетсем болды. Осы айтатыным. Қолымнан келгенше сабырлықпен, ақылға салып, артын ойлап, қолымнан келгенше тырысып жатырмын. Ешкімнен қорқып тұрғаным жоқ. Бірақ сұрайтыным, президентімізден, министрден әділ сот болуын сұраймын. Әлсіздігімді ешкімге көрсетпеймін. Иә, шындықты айтып қойдым. Талғардағы, әкімдіктегі былықты, ауруханадағы былықты. Сол үшін өлтіретін болсаңыздар да, менің бауырларым, ата-анам көрмесін, ататын болсаңыздар да. Мені жоқтап жыламасын деймін. Ал менің қылмысым бар екен, олар пышақпен келді. Мен ол жерде енді қалам ұстап шықпайтын шығармын? Болмаса қағаз алып... Жалбарынып-жалынып сұрадым олардан. Қолдарынан алып. Қолдарын еркекше беріп кетті сол жерде «болды» деп. Енді артынан келіп істеп отырған тірлігі. Менің отбасым, мен, Шерзат, Нұрқанат болып қан төксек, қараласаңыздар болады. Қан төкті бұлар, қанішер деп. Мен қан төккенім жоқ, қан төкпеймін де. Неге десеңіздер, менің басымда болып жатқан жағдайды: қарындасым, әйелім, анам қалай жылағанын көрсеңіздер, сол кезде түсінесіздер. Сол себепті айтатыным, соғыс жоқ, бейбіт заманда ана жыламауы керек, әжелер жыламауы керек. Білсеңіздер, «анам-әкем» деп жылау бір бөлек, «ботам» деп жылау мүлде басқа әлем. Сол үшін қорықты, үркіді деп айтады... Ақылға, байыпқа, сабырға келіп, мен қазақ болғаннан кейін, бірде бір қазақтың қаны ақпасын деп... Айтарым осы... Ал соттаймын десеңіздер, соттаңыздар. Жоқ, атамыз, өлтіреміз десеңдер, өлтіріңдер. Бірақ көзім жетті. Қазақстанда әділетті шешім шықпайтынына. Тек бір ғана өтінішім, қазақ елінде ешқандай қан төгіс болмасын. Президенттен сұрайтыным отбасымды аман-есен алып кету. Болмаса басқа мемлекетке бала-шағамды алып шығып кетемін», — деді ол.

Қайғыдан қан жұтқан әке Қазақстанда әділ шешім шықпайтынына көзім жетті деп отыр. Бұл «өшіп кетті» деген бейнежазбалардың үзінділерінде Қаржаубайдың пышақ ұстаған сәті желілерде таралып кеткен соң шықты. Оның анасы да сөз сөйлеп, өздерін қаралау үшін, ыңғайлы жерлерін кесіп жариялады деп отыр. 

«Бізді осы дәрежеде қорлайтындай біз бұл адамдарға не жаздық? Біз олардың үйлеріне, дүкендеріне арақ сұрап бармадық қой. Заң орындарында адамдары бар адамдар. Енді сол заң орындарындағы адамдар, азаматсыңдар ғой, сендер де. Сендердің бастарыңа түспей ме, осы күн? Алладан қорықпайсыңдар ма? Жаратушы иемнің бар екеніне, сол дәрежеде сенімдерінің жоқтығына мен таң қаламын. Видео жоқ дедіңдер де, қайтадан бөліп-бөліп өздеріңе ыңғайлап, әр жерін кесіп, мына жері мынадай болды деп... Аққа құдай жақ деген. Әрқашан ақ боламыз ба, қара боламыз ба, бір Алла біледі. Бірақ менің балаларым адам өлтірген жоқ. Адамның қанын ішкен жоқ. Өздеріңнің ар-намыстарың білсін. Халқым, өздерің осының ақ-қарасын шешіңдер. Не айтып, не қою керек екенін... Тіпті... Айтып тұрмын ғой. Баламның осы дәрежеде... Адамды перзентінен айырмасын. Атам деп жұбатса да, ботам деп жұбатпасын деген. Сол күндер сіздердің бастарыңызға түспейінше түсінбейтін адамдар болуларың керек. Түсінгенге мынадай қайғыға батып отырған үйге бұлай тиіспес едіңдер. Адамның ұясы бұзылмасын. Адамның ұясын бұзбаған жақсы бұл өмірде. Оралман деп, сырттан келгендер деп осындай дәрежеге алып келіп отырған болсаңыздар, мен елімнен ұрлық-қарлық жасап, қаңғып кеткен адам емеспін. Өзімнің еліме, жұртыма, қазақ еліме, атамекеніме келіп отырмын. Соны түсініп, шамаларың жетіп жатса. Мен 89 жылы көшіп келген адаммын. Менің бала-шағам осы жерде туды. Олардың кіндік қаны осы жерге тамды. Осы жерде саналы, сабырлы азамат болып өсіп жатыр. Документтері бар, удостоверениесі бар азаматтар. Сондықтан ой елегінен өткізіп, кішкене болса да халқым, сабырға келіп, қараның, ақтың не болып жатқанына өздерің ақыл қосасыңдар ма, алып қосасыңдар ма, я қаралайсыңдар ма, ақтайсыңдар ма? Өздерің білесіңдер. Мынау түсініксіз жағдай. Бұл қорлаушылық. Менің балам өліп, мен ауруханада жүрдім, баламды қоямын деп жүрдім. Сол аралықты пайдаланып, құдайдан қорықпағандар, осындай видеолар шығарып, жоқ болып кеткен видеоларды ыңғайластырып қосып жатқан азаматтардың бастарына берсін осы күнді», — деді Қаржаубайдың анасы.

Еске сала кетсек, Шерзат Болат пен отбасының дүкеніне бір топ адам келіп, жанжалдасып, артынша ұлы Шерзатты пышақтап кеткен болатын. Әкесі мен жақындары бірнеше адаммен Талғарда көшеге шығып, әділ тергеу жүргізуін талап еткен еді. Ал 12 қазан күні олардың Азат ауылындағы үйлерін өртеп кетті. Өрттен кейін әкесі өзіне «үйді өзі өртеді» деген сөздер айтылғанын жеткізіп, жұрттан ешқандай қаражат жинамауын сұрады. 

Ал осы істе «Талғар ауданын қорқынышта ұстайды» деген қауесет тараған, қылмыстық топтың жетекшісі деп болжанған адам  Хасан Қасымбаев Orda.kz тілшісіне сұхбат берді. Онда өзінің қылмыстық топқа қатысы жоқ екенін мәлімдеді. 

Алайда Хасан Қасымбаевтың есімі осы істе бірнеше рет аталды. Жұрт бұл жайлы ашық айтудан бас тартып отыр.