Қазақстанда 17 жасқа толған жігіттер бірден әскери есепке алынады

Қорғаныс министрлігі 28 қазаннан бастап 17 жасқа толған кез келген жігітті туған күнінде автоматты түрде әскери қызметке тіркейді, деп хабарлайды Orda.kz.

Енді қазақстандық жасөспірімдерге әскери есепке тұру үшін жеке әскери комиссариатқа барудың қажеті жоқ. Қазақстанда әскерге шақырылушылар мен әскерге баруға міндеттілерді әскери есепке алу тәртібіне өзгерістер енгізілді. Жаңа тәртіпке сәйкес, ер азаматтар 17 жасқа толған кезде олардың әскери есепке алынуы автоматты түрде жүргізіледі. Яғни, жеке барудың қажеті болмайды. 

Жүйе өзге мемлекеттік дерекқорлардан мәлімет алады. Оның ішінде ЖСН, аты-жөні, туған күні мен жері, оқу орны немесе жұмыс орны, білімі, отбасылық жағдайы, жүргізуші куәлігі, сондай-ақ тіркеу мекенжайы туралы ақпарат бар. Бұдан бөлек, жүйе азаматтың денсаулығы, мүгедектігі, емделіп жатқаны және қылмыстық істер, тергеу не сот үкімдерінің бар-жоғын да тексереді. 

Осыдан кейін азаматтың картасында автоматты түрде «әскерге дейінгі есептегі» мәртебесі белгіленеді. Ал тіркеу мекенжайы бойынша жергілікті әскери есеп органының атауы анықталады.

Бұған дейін қорғаныс министрлігі әскерді цифрландырудың жаңа кезеңі басталғанын хабарлаған болатын. Енді әскерге шақырылушылар әскери бөлімді интернет арқылы таңдай алады.

Еске сала кетсек, бұған дейін 5 қазан күні Алматы облысында қаза тапқан сарбаздың туыстары Алматы қаласындағы орталық мәйітханадан оның денесін ала алмай отырғанын хабарлады. Ресми деректерге қарасақ, 18 жастағы Нұрасыл Әнуар менингококцемия деген диагноздан көз жұмған. Жақындары бұл нұсқаға сенбейді. 

Ал 17 қыркүйек күні Алматы облысы Жамбыл ауданының Отар горнизонында 19 жастағы жас сарбаз Шынарбек Дінмұхаммед Талғатұлы өзіне-өзі қол салды. Мүрдесін көруге ата-анасы Алматы қаласына келді. Orda.kz тілшісі марқұмның ата-анасымен сөйлесіп, жағдайға қатысты пікірлерін білді.

6 қазан күні Маңғыстаудағы «Үстірт» шекаралық бекетінде мерзімді әскери борышын өтеп жүрген Еркебұлан Сағындықов қаза тапты. Туыстары құзырлы мекемелердің берген жауаптарына сенбей, қатардағы жауынгерлерден күдіктеніп отыр.

Ал 23 қыркүйек Маңғыстау облысында 18 жастағы жас сарбаз Cұлтан Шынтеміров жындыханаға түсті.

Еске салсақ, Алматы қаласында №5571 әскери бөлімде  мерзімді қызмет атқарып жүрген сарбаз ауыр жарақат алды, ол ғимараттың үшінші қабатынан секіріп кеткен болатын.