Қазақ тілі – кедейлердің, арба сүйрегендердің тілі: Мәжіліс депутаты Самат Нұртазаның басы дауға қалды

Мәжіліс депутаты Самат Нұртаза қазақ тілі – сіңірі шыққан кедейлер мен арба сүйреушілердің, даяшылардың тілі деген пікір жазып, елді шулатты, деп хабарлайды Orda.kz.

Ол мұндай пікірін Facebook желісінде тіл тағдыры жайлы жазба шығарған адамның постына жеке ой ретінде қалдырған. Бірақ осы шудан кейін өшіріп тастап, артынша ақталып, не себепті бұлай жазғанын айтыпты.

Осы шудан кейін депутат парақшасында бұны ашумен жазғанын айтып ақталды.

«Соңғы күндері әлеуметтік желіде талқыланып жатқан "коммент-пікіріме" байланысты түсіндірме берейін. Бұл 2019-2020 жылдары тіл төңірегіндегі дискуссияда жазған комментарий болатын.
Ол тұста белсенді блогер ретінде, тіл мәселесіндегі диспутқа араластым. Негізгі ойым – осы пікір арқылы тілге, тәртіпке, Заңға деген құрметті күшейту үшін, керісінше мағынада жазылған ой болған. Яки, шүйліккеннен, эмоцияға берілгеннен ашынған ойым еді», - деді депутат.

Нұртазаның айтуынша барлығы ашу - ызамен болған екен.

«Егер бұл комментарийлерім біреудің ар-ожданына тиіп кеткен болса, ресми кешірім сұраймын.
Мақсат ортақ – мемлекеттік тілдің мәртебесін көтеру! Заң мен Тәртіпке бағынып, барлық азаматтардың Заң алдында құқығы бірдей болғаны» деп қорытты депутат.

Постың астына халық түрлі пікір қалдырған біреулер депутаттың өзі бұлай десе, басқа кім не айтпайды деп Бас прокуратураға арыз түсіргенін жазып жатыр. Желі қолданушылары «Бас проокуратураға арыз кетті», «Бұл жұмысынан кетіп, жазаланбаса, мен қоя салдым», «Дұрыс жазу керек, өз ана тілін құрметтемеген адам мәңгүрт адам. Қалай депутат болып жүргені үлкен сұрақ», «Біздің салығымыздан жалақы алатын адам осылай жазса, басқалары не жазбайды?», «Қазақтарға не болған, өз тілінен жеріп» деген сарында пікірлерін жарыса жазды.