Каспий құбыр консорциумындағы төгілген мұнайдың салдары жойылды

Каспий құбыр консорциумы (КҚК) терминал акваториясында болған мұнай төгілуінің салдарын жою жұмыстарының аяқталғанын хабарлады. Бұл туралы Orda.kz консорциумның баспасөз қызметіне сілтеме жасап жазады. Жергілікті ауқымдағы төтенше жағдай режимі тоқтады.

Еске салайық, алдыңғы күні Новороссийск қаласындағы Каспий құбыр консорциумы терминалында мұнай төгілген еді. Бұл терминал арқылы Қазақстан мұнайының басым бөлігі Еуропаға экспортталады.

Оқиғаның себептері мен төгілген мұнай көлемі әлі анықталып жатыр. Жиналған мұнай-сулы эмульсия кәдеге жаратуға жіберілді.

Белгілі болғандай, мұнай төгілуі танкерге жүктеу кезінде жүзбелі шлангтың жарылуы салдарынан болған.

Жою операциясына 13 сүйреткіш кеме, төрт шағын кеме, бес мұнай жинау қондырғысы, тоғыз жүзбелі сыйымдылық қатысқан. Сонымен қатар, 1000 метрден астам бонды қоршау орналастырылды.

Компания мәліметінше, мұнай төгілген орын жедел оқшауланған. Операция барысында және одан кейін де теңіз беті мен атмосфералық ауаның экологиялық жағдайы тұрақты бақылауда болады — тәулігіне кемінде екі рет сынама алынады.

Оңтүстік Озереевкадан Анапаның жағалауына дейінгі аумақтар тексерілді — мұнай іздері табылмады.

Ал Росприроднадзор мәліметінше, апат салдарынан Қара теңізге шамамен 30 текше метр мұнай құйылған. Қазіргі таңда оның таралу қаупі жоқ.