«Кәсібиліктің жоқтығы мен немқұрайлылық» — Тоқаев медсақтандыру қорындағы былықтар туралы айтты

Мемлекет басшысы Қызылордадағы Құрылтайда медициналық сақтандыру кезіндегі өрескел қателіктерді тілге тиек етті, деп хабарлайды Orda.kz

Әлеуметтік медициналық сақтандыру қорын тексеру барысында ауқымды заңбұзушылықтар мен теріс пайдаланушылықтар анықталды. Құжатқа қосып жазудан бастап, бұрмалауға дейінгі былықтар белгілі болды.

«Бүкіл ел сапалы экономикалық өсім мен денсаулық сақтауды инфрақұрылымдық жобаларын дамытуға бар күшін салып жатыр. Ал әлеуметтік салаға бөлінген қыруар қаржы қолды болып жатыр. 2024-2025 жылдары тек денсаулық сақтау саласын дамытуға мемлекет 7,8 триллион теңге бөлді. Бұл 15,5 миллиард доллар», - деді Тоқаев.

Бұл ақша медицинаның дамуы мен қазақстандықтардың денсаулығы үшін бөлінген. Алайда олардың бір бөлігі жай ғана жымқырылған.

Тоқаев құқық қорғау органдарына сыбайлас жемқорлық схемаларының барлық пайда алушыларын анықтауды тапсырды. Сондай-ақ, ол Үкіметтің МӘМС қорын Қаржы министрлігінің қарамағына беру туралы шешімін қолдады.

«Қорда болған жағдай - мемлекеттің мүддесіне немқұрайлы қараудың салдары», - деді президент.

Оның айтуынша, әлеуметтік саладағы осындай алаяқтық әрекеттер қазірдің өзінде ұлттық қауіпсіздікке қатер төндіріп отыр.

Еске салсақ, олардың қатарында жалған пациенттерді тіркеу, ер адамдардың әйелдерге арналған скринингтерден «өтуі», балаларға бір күнде мыңнан астам дәрі-дәрмек жазу, тіпті қайтыс болған адамдарға медициналық қызмет көрсету фактілері болған.