«Қайрат» – «Реал» матчы кезінде Qazaqstan мен Qazsport сайттары істен шықты

Алматыда «Қайрат» – «Реал» ойыны барысында Qazaqstan және Qazsport телеарналарының сайттарына кіру мүмкін болмай қалды, деп хабарлайды Orda.kz.

Онлайн көрсетілімді қосқан сәтте Qazaqstan телеарнасының сайтында «Сервер табылмады» деген хабарлама шықты. Qazsport сайтына кіргенде «Серверден жауап күту уақыты аяқталды» деген жазба пайда болды.

Кей кездері трансляция қосылғанымен, ол өте сирек жағдай болды.

Чемпиондар лигасының екінші турындағы «Қайрат» – «Реал» кездесуі Алматының Орталық стадионында 21:50-де басталды. Бұл ойын тарихи саналады, себебі әлемнің ең беделді клубтарының бірі – «Реал Мадрид» Қазақстанға алғаш рет негізгі құрамын әкелді.

Кездесуге деген қызығушылық ерекше болды. Матч өтетін күні стадион маңында көрермендер көп жиналып, кіреберісте кептеліс туындағаны бейнежазбаларда анық байқалды. Сондай-ақ ойынды көру үшін Алматыға шетелдік жанкүйерлер де келген.