«Қайрат» пен «Реалдың» ойыны стадионнан көрінбейтін орындарды удай бағаға сатты

Чемпиондар лигасы аясында өтетін қазақстандық «Қайрат» пен мадридтік «Реалдың» ойынында Батыс трибунаның 13 және 14-секторларында көрермендердің көру аймағын қабырға жауып қалады. Соның салдарынан стадионға келгендердің бір бөлігі алаңның тек жартысын ғана көре алады, деп хабарлайды Orda.kz.

Соған қарамастан, дәл осы орындарға ең қымбат билет — 250 мың теңгеден сатылған.

Әлеуметтік желілерде жанкүйерлер бір-бірін осы орындардан сақтандырып, фотолар жариялай бастады.

Бұл жағдайға қатысты ҚР Экономика бірінші вице-министрі Азамат Әмрин пікір білдірді:

«Барлық стадиондарымыз халықаралық стандарттарға сәйкес деп оқыдым. Бірақ бұл жерде нақты жауапты стадион иесінен сұраған дұрыс. Ал ойынға болжам жайлы айтсақ... Нәтижесін күтейік. Білесіздер, кейде футболда ғажайыптар да болады», — деді ол.

Айта кетейік, 30 қыркүйекте өтетін «Қайрат» – «Реал Мадрид» ойынына экс-президент Нұрсұлтан Назарбаевтың әулеті келеді деген ақпарат тарады.