«Қабағым жарылды»: Ләйлә Сұлтанқызы FlyArystan-ның үстінен арыз жазды

 FlyArystan әуекомпаниясы  тағы да дауға қалды. Шымкент-Астана бағытында ұшқан журналист Ләйлә Сұлтанқызы басына қатты зат құлап, жарақат алғанын хабарлады.

Бұл туралы ол өзінің instagram парақшасында жариялады.

Оның айтуынша, бортсеріктер алғашқы көмек көрсете алмаған, себебі бортта дәрі-дәрмек жинақтамасы мен мұз болмаған.

«Мен FlyArystan-ның үстінен арыз жаздым! Бүгін кешкі 21:50 шамасында KC7326 рейсімен Шымкенттен Астанаға ұшып келдім. Ұшақтың есігі ашылмай жатып тұрып кеткен жанымдағы жолаушының абайсыздығынан бетіме үстіңгі сөреде тұрған ауыр (қатты) зат отырған маған құлап, КӨЗІМНІҢ ТҰСЫН ЖЫРЫП, ҚАБАҒЫМ ЖАРЫЛДЫ. Бұл FlyArystan әуекомпаниясы қауіпсіздік шарасын сақтамағандықтан орын алған жағдай. Бордсеріктер мен әуекомпанияның алғашқы көмекке дайын емес болғанына қапа болдым! Не аптечка, не мұз, не суық зат, не қан тоқтататын, не салфетка жоқ», – деді Ләйлә Сұлтанқызы.

Сондай-ақ, ол өзінің орнында қарт кісі немесе бала отырса жағдай қиын болатынын айтты. Бұл жағдайды жауапсыздық деп сынады.

«Меніңше, орнымда бала, қарт адам отырып, басы жарылса, қатты жараланса, миы шайқалса, көп қан кетсе, жағдай қиын болар еді. Жауапсыздық! Әр бортсерік жолаушы мініп-түскенше адам денсаулығына жауапты, алғашқы көмек көрсетуге міндетті!», – деді Ләйлә Сұлтанқызы.

Еске сала кетсек, Orda.kz FlyArystan әуе компаниясының Астана әуежайында кәмелетке толмаған 12 жасар жолаушыны жалғыз қалдырып ұшып кеткені үшін  жауапқа тартылғаны жайлы жазған болатын.