Иран мен Израильде 351 қазақстандық бар – СІМ

Таяу Шығыстағы ахуалдың ушығуын Қазақстан сыртқы істер министрлігі бақылауда ұстап отыр, деп хабарлайды Orda.kz.

Ведомствоның ресми өкілі Айбек Смадияровтың айтуынша, қазіргі таңда Иранда – 132, ал Израильде – 219 қазақстандық азамат бар.

«Қазақстанның бұл елдердегі елшіліктері күшейтілген тәртіппен жұмыс істеп жатыр. Дипломаттар азаматтармен тұрақты байланыс орнатқан», – деді ол.

Смадияров сонымен бірге Таяу Шығыстағы шиеленіс кезінде қазақстандықтардың зардап шекпегенін атап өтті.

«Мемлекеттік органдардың ескертуіне қарамастан, соңғы екі күнде әуе тасымалдаушылар Қазақстаннан БАӘ бағытына жолаушы тасымалдады», – деді министрлік өкілі.

Сондай-ақ, таңертең Түрікменстан Ираннан қазақстандықтарды эвакуациялау үшін транзиттік дәліз ашқаны белгілі болды. Қазір министрлік әуе компаниялармен және «Туристік қамқор» қорымен бірлесіп, туристерді елге қайтару жұмыстарын жүргізіп жатыр.