Халық үкіметке емес, үкіметтің өзі халыққа масыл болып отыр

Қоғам қайраткері Мұхтар Тайжан Ауыл партиясының жетекшісі Әли Бектаевты сынға алды.

Бұл туралы Orda.kz хабарлады.

21 маусым парламент отырысында депутат Әли Бектаев халыққа жәрдемақы көп берілетіндіктен, масылдық психология етек жая бастады деп алаңдаушылық білдірген.

Ол көпшіліктің сынына алынып, «халық арасындағы масылдық психологиясын айтпас бұрын, депутаттар өз араларындағы ашкөздік психологиясын жойсын» деген сын естіген.

Әли Бектаевтың ойымен Мұхтар Тайжан да келіспеді. Ол өзінің Facebook парақшасында «партияның өкіліне халықты «масыл» деп айту тіпті ұят» дейді.

– Халық мемлекетке (Үкіметке) ешқандай масыл емес. 

Ауыл партиясының жетекшісі Бектаев мырзаны мен сыйлаушы едім, әлі де құрметтеймін. Бірақ, халыққа масыл деп айту - мүлдем негізсіз.

Соңғы 10 жылда мемлекет жеке секторын жойып, мемлекетттік экономиканы орнатты. Қазақстан экономикасы нағыз советтік-госпландық экономикаға айналып кетті. Қайда барсаң мемлекеттің рөлі басым, монополия.

Бұндай жағдайда жұмысшы орындар әлбетте азаяды, ал әлеуметтік көмек көбейеді. Бұндай жүйені үкімет-мемлекет өзі құрып алды.

Ал Ауыл партиясының төрағасы жайылымдармен не болып жатқанын жақсы біледі деп ойлаймын. Жайылымдар блатнойлардың ғана қолында. Қарапайым халық жайылымсыз қиналып отыр. Сондықтан нақты бұл партияның өкіліне халыққа «масыл» деп айту, тіпті ұят.

Ал Үкімет Ұлттық қорымызды жеп болды, ол туралы мен жазғанмын. Ұлттық қор дегеніміз ол халықтың қазынасы, ұрпақтың үміті. Демек үкіметтің өзі халыққа масыл болып тұр, - деп жазды ол.