Еліміздегі скрининг бағдарламаларының саны артты

Қазақстан Республикасының денсаулық сақтау министрлігі жоспарлы госпитализация алдында көрсетілетін консультациялық-диагностикалық қызметтерді оңтайландырып, скрининг бағдарламаларын жаңартты, деп хабарлайды Orda.kz.

Енді скринингке тек тиімділігі ғылыми тұрғыда дәлелденген зерттеулер ғана енгізілді. Атап айтқанда, төмен тығыздықты липопротеидтер (ЛПНП), триглицеридтер және гликирленген гемоглобин көрсеткіштері қарастырылады.

Негізсіз дәрігерлік консультациялар алынып тасталды: көрсеткіштері қалыпты болған жағдайда тексеруді медбике жасай алады.

Скринингке қатысушылардың жас шегі 76 жасқа дейін ұлғайтылды. Сонымен қатар, 50 жастан асқан ер адамдар МӘМС  аясында әр екі жыл сайын брахиоцефалдық тамырларға ультрадыбыстық зерттеу (УДЗ) тапсыра алады.

Ведомство мәліметінше, 2025 жылғы қыркүйектен бастап онкологиялық скринингтің барлық кезеңдері ТМККК (ГОБМП) шеңберінде қолжетімді болады. Сондай-ақ скринингтік зерттеулер тізіміне инсультті ерте анықтауға және В және С созылмалы вирустық гепатиттерін анықтауға арналған тексерулер енгізілді.

2026 жылы оңалту және паллиативтік көмек көрсету бағыттары бойынша маршруттарды қайта қарау жоспарланып отыр.

Айта кетейік, жақында әлеуметтік медициналық сақтандыру қорының  жұмысында көптеген заңбұзушылық анықталды. Олардың қатарында жалған пациенттерді тіркеу, ер адамдардың әйелдерге арналған скринингтерден «өтуі», балаларға бір күнде мыңнан астам дәрі-дәрмек жазу, тіпті қайтыс болған адамдарға медициналық қызмет көрсету фактілері болған. 

Осындай тиімсіз жұмыс істеген әлеуметтік медициналық сақтандыру енді қаржы министрлігінің қарауына берілді.

Оқи отырыңыз:

• Биылдан бастап МӘМС арқылы кімдер тегін емделе алады
• 2026 жылғы МӘМС-тің жаңа ережелері: Медициналық көмекті бюджеттен алуға бола ма?
• «Кәсібиліктің жоқтығы мен немқұрайлылық» — Тоқаев медсақтандыру қорындағы былықтар туралы айтты