Елімізде жанар-жағармай бағасының өсуіне және автогаздың тоқтап қалуына шағымданатын жедел желі ашылды

Қазақстанда бензин бағасының өсуіне және автогаздың тоқтап қалуына шағымданатын жедел желі ашылды, деп хабарлайды Orda.kz  Энергетика министрлігінің баспасөз қызметіне сілтеп.

 «Энергетика министрлігі азаматтардың бензин мен дизель отынына баға мораторийін бұзу фактілері бойынша, сондай-ақ жекелеген АЖҚС-да сұйытылған мұнай газының (автогаз)  мәселелері бойынша өтініштерін тіркейді. Бәсекелестікті қорғау және дамыту агенттігімен (БҚДА) және Энергетика министрлігінің өңірлік штабтарымен бірлесіп алыпсатарлық пен отынның жасанды тапшылығын туғызу әрекеттерінің кез келген жолын кесетін болады. Егер сіз АИ-92 маркалы бензин бағасының көтерілуі немесе ЖҚС-да отынының болмау фактілеріне тап болсаңыз, +77018550248 жедел желісіне хабарласуыңызды сұраймыз» деп жазылған хабарламада. 

Бензин мен дизельдік отынға қатысты министрлік өңірлердің өтінімдеріне сәйкес отынның барлық қажетті көлемдері мұнай базаларына тиелгендігін баса айтады.

«Тапшылыққа ешқандай объективті себеп жоқ», деп мәлімдеді энергетика министрлігінде. 

 Сұйытылған мұнай газына қатысты ведомство өндіруші зауыттардың біріндегі жоспарлы жөндеуді министрлік жеткізу кестесін қалыптастыру және сұранысы жоғары өңірлер үшін қосымша көлемдер бөлу кезінде алдын ала ескергенін атап өтті.

«Осылайша, жекелеген АЖҚС-тағы кезектер жүйелі тапшылыққа емес, жергілікті жерлердегі ішкі бөлу және логистика мәселелеріне байланысты» деп жазылған хабарламада.

Энергетика министрлігі жедел желіге өтініштерді қабылдауды күн сайын 24/7 режимінде жүзеге асыруға уәде берді.

 «Әрбір мәселе пысықталатын болады. Фактілер расталған жағдайда нарықтың жосықсыз қатысушыларына тиісті шаралар қабылданады»  деп сендірді ведомство. 

Жақында Қырғыз Республикасының Монополияға қарсы реттеу агенттігінің директоры Жеңіс Орозбаев ресейлік жағармайды неғұрлым тиімді деп санайтынын айтты.

Жыл басында еліміздегі  жанар-жағармай материалдарының бағасын мемлекеттік реттеуге бағытталған 10-нан астам нормативтік құқықтық актілерді енгізу туралы ұсыныс ( жанар-жағармай) қарастырылды.