Бұрынғы әйелін соққыға жыққан экс-әкімге сот үкімі шықты

Атырауда бұрынғы әйелін ұрды деп айыпталған Атырау облысы Мақат ауданының бұрынғы әкімі Ринат Ибрагимовқа үкім шығарылды.

Бұл туралы Жоғарғы Сот хабарлайды.

Мамыр айында бұрынғы зайыбы Ринат Ибрагимовтың өзін ұрып-соққанын айтып, Ақмарал Үмбетқалиева шағымданды. Оның сөзінше, ер адам 11 жыл бойы бірге тұрған кезде отбасында балаларының көзінше қол көтеріп келген. Сондай-ақ, әйел балаларын бір жыл көрмегенін мәлімдеді. Ибрагимов болса бұның бәрін жала деді. 

Алайда, Ринат Ибрагимов ҚР қылмыстық колдекстің 107- бабы, 2-бөлімінің 3-тармағы, яғни,«қасақана адам денсаулығына зақым келтіру» бойынша кінәлі деп танылды. 

«Ринат Ибрагимов айыпты деп танылсын және оған 2 жылға бас бостандығынан айыру жазасы тағайындалады. Жазаны өтеу кезінде оған мемлекеттік органдарға ескертпей тұрғылықты мекен-жайын және жұмыс орнын ауыстыруға тыйым салынады. Сондай-ақ Атырау облысынан шығуға тыйым салынады.Тұрғылықты жерінен сағат 22:00-ден 06:00-ге дейін шығуға, алкагольдік ішімдіктер ішетін орындарға және құмар ойын ойнайтын жерлерге де баруға тыйым салынады. Одан Ақмарал Үмбетқалиеваға келтірген моральдық зақымдары үшін 2 миллион теңге өндірілсін» деп үкім шығарды сот.

Үкім заңды күшіне енген жоқ.