«Бұл – жаңа саяси модель» — Тоқаев ірі реформа туралы айтып, Құрылтайда нақты идея ұсынылатынын меңзеді

Ақордада алдағы конституциялық реформаға қатысты мәселелер қайта талқыланды. Парламенттік реформа жөніндегі жұмыс тобы отырысында мемлекеттік кеңесші Ерлан Қарин парламентті трансформациялау бойынша жұмыс барысын баяндады, деп хабарлайды Orda.kz. 

Президенттің құқықтық мәселелер жөніндегі көмекшісі Ержан Жиенбаев азаматтардың ұсыныстары негізінде қалыптасқан конституциялық реформаның негізгі бағыттарын таныстырды. Бірпалаталы парламенттің өкілеттік мерзімі, сайлау тәртібі, заң шығару тетіктері және басқа билік институттарымен өзара іс-қимылы қарастырылған.

Парламентаризм институтының директоры Наталья Пан ұсыныстардың eOtinish пен eGov платформалары арқылы, сондай-ақ саяси партиялардан, бизнес өкілдерінен және заңгер-ғалымдардан түскенін айтты.

Ақорда мәліметінше, президент талқылау нәтижелері мен сараптамалық қорытындыларды мұқият зерттеп отыр. Қасым-Жомарт Тоқаев бұл реформа заң шығарушы билікті қайта форматтауға бағытталғанын атап өтті.

Президенттің айтуынша, Ұлттық құрылтай отырысында нақты идеялар ұсынылады. Парламенттік реформаны іске асыру үшін Конституцияның бірнеше бөлімі қайта қаралуы тиіс, ал ұсынылған түзетулер мазмұны жағынан Қазақстанның жаңа Конституциясын талқылауға негіз болады.

Саясаттанушы Ғазиз Әбішев болашақ парламенттің Конституциялық сот пен құқық қорғау органдарына ықпалы қандай болатыны маңызды екенін атап өтті. Оның пікірінше, жаңа билік теңгерімі қалыптасса, парламенттің ықпалы артуы мүмкін. Ал керісінше жағдайда реформа құрылымдық өзгерістермен ғана шектелуі ықтимал.

Айта кетейік, Трамп Тоқаевты Газадағы бейбітшілік кеңесіне шақырды.