Бөгет бұзылған жағдайда Қазақстан Қытайдан 10 миллиард текше метр су қабылдауға дайын

Су ресурстары және ирригация министрі Нұржан Нұржігітов Қазақстанның Қытайдан су қабылдауға дайын екенін мәлімдеді. Ол Шығыс Қазақстан облысының тұрғындарымен кездесуінде облыстағы гидротехникалық нысандардың жұмысын тексеріп, жағдайға түсініктеме берді, деп хабарлайды Orda.kz порталы.

«Қытайдан секундына 1810 текше метр су келеді. Бұқтырма су қоймасында 39 миллиард текше метр су жиналды,  су қоймасы Қытайдан қосымша су қабылдауға дайын. Жағдай бақылауда: бассейндік инспекция мен Қазсушаруашылығы мамандары тәулік бойы кезекшілікте», – деді Нұржігітов. 

Сондай-ақ, Су ресурстары министрлігінің баспасөз қызметі Боран ауылы маңындағы бақылау-өлшеу стансасы аумағындағы Қара Ертіс өзеніндегі су ағыны секундына 1800 текше метр, су деңгейі 557 сантиметр болғанын айтты.