«Біз үшін жұмбақ»: Алматыда үстіне кран құлап қайтыс болған марқұмның туыстары наразылық білдірді

3 маусым күні Алматыда құрылыс алаңында жұмысшының үстіне кран құлап,  құрылысшы сол жерде мерт болды. Марқұмның туыстарының айтуынша, құрылыста қауіпсіздік шаралары сақталмаған. Олар құзырлы органдар істі жылы жауып тастай ма деп алаңдайды. Бүгін сол құрылысшының туыстары оқиға болған жерге барып, БАҚ өкілдеріне сұхбат берді. Orda.kz тілшісі оқиға орнына барып, мән-жайды біліп қайтты.

Күзет бөлімінің басшысы Аслан Жазайыровтың айтуынша, тергеу амалдары жүріп жатыр.

«Жасыратын ештеңесі жоқ. Қазір құзырлы органдар тергеу амалдарын жүргізіп жатыр. Оқиға кеше 15:00-16:00 арасында болды. Кран құлағаннан кейін бірден жедел жәрдем мен төтенше жағдай қызметкерлеріне хабарластық. Кранның ұзындығы шамамен 30 метрдей болатын шығар», – деді күзет бөлімінің басшысы. 

Сондай-ақ, Асланның сөзінше, құрылыс нысанының өзінде де дәрігерлер бар және олар бірінші болып алғашқы көмек көрсеткен. Ал жедел жәрдемнің өзі шамамен 5-7 минут аралығында келді. Асланның сөзіне қарасақ, оларда барлық қауіпсіздік техникасы жіті сақталған.

«Нысанда 4 кран бар. Ең жаңасы осы құлаған кран. Ал қалғандары ескі кеңес үкіметінен келе жатқан крандар».

Ал марқұм құрылысшының туысының сөзінше, кранға демонтаж жасау керек болған. Ал марқұмның демонтаж жасау кезінде не үшін үстіне шыққаны белгісіз. Оның неліктен олай істегені және оған үстіне шығуға кім рұқсат бергені де беймәлім. 

«Бұл салада оның қаншама жыл еңбек өтілі бар болғанымен ол кранмен ештеңе көтермеген, дауыл тұрмаса ол қалай өздігінен құлап қалды? Ол біз үшін жұмбақ», – деді марқұмның қайын ағасы Алпысбай Белеков.

Оның сөзінше, осы оқиғадан кейін жоғарыдан диспетчер келген. Ал кеше краншылар келді. Басшылықтан әлі ешкім келген де жоқ. Алпысбай Белековтің айтуынша, оның бұл қызметте жүргеніне 15 жылдан асып кеткен. 

«Оның қайтыс болуы бәрімізге түсініксіз болып тұр. Ал нысанға кіргіміз келгенімен, бізді кіргізбеді. Қауіпсіздік қызметі келеді деп еді, ол сол күйі жоқ. Кіру үшін тергеушінің рұқсатымен және онымен бірге кіру керек дейді. Оқиғаны түсіндіруді сұрап келіп едік, ешкім шықпады да, түсіндіре алмады да». 

Алпысбайдың сөзінше, оған қасындағы жұмыскерлер мәйіттің кранның астында 4 сағаттан астам уақыт бойы жатып қалғанын айтқан. 

Еске сала кетейік, бұған дейін «Next Level» атты ағылшын курсының басшыларының ұстаздарды айлықсыз қалдырып, шетелде жүргені туралы жазған болатынбыз.