Атырауда бір отбасын түгелдей қырып салған күдіктіге тағы екі бап бойынша айып тағылды

Атырау облысының Жангелдин ауылында бір отбасын түгелдей қырып салды деген күдікке ілінген Сұлтан Сәрсемалиевке тағы бір қосымша айып тағылды, деп хабарлайды Orda.kz.      

Ішкі істер министрлігінің ресми жауабына сәйкес, күдікті енді Қылмыстық кодекстің екі бабы бойынша тергеліп жатыр.

Бұған дейін тергеу негізгі күдікті ретінде 29 жастағы Сұлтан Сәрсемалиевті қамауға алған болатын. Ол әйелі Ақбаян Мұқанғалиевамен бірге шетелге қашып кетіп, Индонезияның Сенару ауылында ұсталып, елге қайтарылды.

Тергеу қарастыруға қосқан екі бап келесідей:

• 99-бабының 2-бөлігі – «Екі немесе одан да көп адамды өлтіру»;
• 188-баптың 2-бөлігі – «Алдын ала сөз байласу арқылы жасалған ұрлық».

«Атырау облысы полиция департаменті адам өлтіру және олардың мүлкін ұрлау фактілері бойынша қылмыстық істі тергеп жатыр. Күдікті ұсталып, сот санкциясымен қамауға алынды» деп жазылған министрлік хабарламасында. 

Дегенмен ведомство күдіктінің әйелі Ақбаян Мұқанғалиеваның іске қатыстылығына әзірге құқықтық баға берген жоқ.

Еске салсақ, бүкіл жұрттың жағасын ұстатыпғ дүрліктірген оқиға 2025 жылдың желтоқсан айында болған еді. Сол кезде Жангелдин ауылында тұратын зейнеткерлер мен олардың ересек балалары түгелдей жоғалып кеткені белгілі болды. Кейіннен, 6 қаңтарда ерлі-зайыптының мәйіті өз үйлерінің ауласындағы қорадан табылды.

Ұсталып елге келгенен кейін Сәрсемалиев тағы екі адамды Наурыз Мұқанғалиев пен Мейрамгүл Қарабалинаны өлтіргенін мойындап, олар көмілген жерді көрсетті. Марқұмдардың денесін Геолог шағын ауданындағы күдікті жалға алған үйдің ауласынан тапты.

Ақбаян Мұқанғалиева қазір Атырауда психиатриялық сараптамадан өтіп жатыр. Оның іске қатыстылығын тергеп-тексеру жалғасып жатыр.

Атап айтарлығы — бұл іс министрліктің ерекше бақылауында.

Тақырыпқа қатысты оқи отырыңыз:

• Атыраудағы қанды іс: Күйеу бала отбасының төрт мүшесін өлтіргенін мойындады, әйелі психикалық орталықта жатыр
• Атырауда Жангелдин ауылының жоғалып кеткен екі тұрғынының мәйіті табылды
• Атырауда Наурыз бен Мейрамгүлдің жаназасы шықты: Қайын жұртын қырып салған күйеу бала