24 қараша күні кешкі сағат 20:45 кезінде қайтыс болған диссидент ақын Арон Атабектің денесін Алматы қалалық мәйітханасына алып барды. Orda.kz редакциясының тілшілері де аталған орыннан табылды.
Қалалық патологоанатомиялық бюроға (мәйітхана) барған тілшілер екі учаскелік полиция көлігі мен оншақты құқық қорғау органдарының қызметкерлерін кездестірді. Пагон таққан қызметкерлермен тілдесу мүмкін болмады. Сонымен қатар, арнайы жасақ отырған ақ спринтер осы маңда ұзақ тұрды.
Мәйітхананың артқы жағында жиналған бір топ азаматтарды байқадық. Олар ақынды жоқтап келген белсенділер екен. «Арон Атабектің өлімі билікке қазір қажет емес еді, оның тірі болуына олар мүдделі еді» деген топтың арасына кіріп, медициналық сараптама мәселесін шешу үшін мәйіт жанына барған Мұратбек Есенғалиевті күттік.
Бірер уақыттан соң қақпадан шыққан белсенді Мұратбек Есенғалиев пен Балташ Тұрсынбаев алдағы жоспарларымен бөлісті. Олар 15 жылын түрмеде өткізген диссиденттің денесінен медициналық сараптама «жалған коронавирус» тауып, сүйегін туыстарына берместен санитарлық норма бойынша жерлеуі мүмкін деген қорқыныш бар екенін жеткізді. Оған жол бермеу үшін тәуелсіз сарапшы шақыратындарын алға тартты. Белсенділердің бірі мәйітхана маңында қалуға, бірі жер дайындау ісіне, бірі тәуелсіз сараптама жасайтын сарапшы іздеуге уағдаласты.
Түнгі уақытта мәйітхана маңында қалған белсенді Бесжан Төлеубекұлы арнайы жасақтың кезешілігін ауыстырып жатқан сәтін видеоға түсіріп алған.
25 қараша күні таңғы сағат 09:00-де марқұмның денесіне медициналық сараптама жасау басталатыны айтылды. Бүгін отызға тарта адам жиналып, мәйітхана алдында адамның қарасы бірте-бірте көбейіп отырды. Мәйітхана қызметкерлерімен тілдесіп шыққан Мұратбек Есенғалиев патологоанатомиялық бюро ішіндегі сараптаманың жеткілікті екенін хабарлап, жаназасы мен қонағасы өтетін орындарды атады.
Мәйітханаға сағат 10:00 шамасында 68 жасында дүниеден өткен марқұмның Алма және Айдана есімді қыздары келіп, мәйітханаға кіріп шықты. Үлкен қызы мәйітханадан шығып бірден қайтып кетті, ал Айдана Айдархан журналистерге сұхбат беруден бас тартты.
Сағат 15:00 шамасында Арон Атабектің денесін қызына берді. Белсенділер көлік артынан еріп кетті.
Диссидент ақынның жаназасы ертең 26 қараша, таңғы сағат 10:00-де күні өтетін болып келісілді. Марқұмның денесі Бағанашылдағы бейітке жерленеді.
Бек Байтас, Ильдар Адильченов
