Алматыда ер адам жүк көлігінің астына түсіп қаза тапты

Алматы қаласының Алмалы ауданында 31 қаңтар күні кіс өлімімен аяқталған жол-көлік оқиғасы болды. Жаяу жүргіншіні жүк көлігі қағып кетіп, ол алған жарақаттары салдарынан оқиға орнында көз жұмды, деп хабарлайды Orda.kz.

Жол апаты Райымбек даңғылы мен Розыбақиев көшесінің қиылысында болған. Алматы қалалық полиция департаментінің мәліметінше, ер адам жолды белгіленбеген жерден кесіп өткен. Алдын ала болжам бойынша, жүк көлігінің жүргізушісі оны байқамай, қағып кеткен.

Жол-көлік оқиғасының сәті жедел басқару орталығының бейнебақылау камераларына түсіп қалған. Аталған дерек бойынша анықтау басқармасы қылмыстық іс қозғады. Қазіргі уақытта полиция қызметкерлері оқиғаның барлық мән-жайын анықтап жатыр.

Полиция өкілдері жол қозғалысы ережелерін бұзу, оның ішінде жаяу жүргіншілер тарапынан жасалған заңбұзушылықтар да қайғылы салдарға әкелуі мүмкін екенін ескертті.

Еске салсақ, Алматыда мопед жүргізушісін қағып, оқиға орнынан бой тасалаған автокөлік жүргізушісі әлі табылмады. Жол апаты 28 қаңтар күні кешкі уақытта Бостандық ауданында болған.

Оқи отырыңыз:

• Құлсарыда жеті жасар қызды азаптап өлтірген қылмыскер өмір бойына қатаң режимдегі түрмеге тоғытылды
• Рыбакина әлемнің бірінші ракеткасын жеңіп, Australian Open-2026 жүлдесін иеленді
• Атырауда «жасыл белдеуді» құрылыс салу үшін берген ауыл әкімі қызметінен кетті